భారత్ కు రేవంత్ రెడ్డి.. అర్థాంతరంగా అమెరికా పర్యటన ముగింపు

అమెరికా పర్యటనలో ఉన్న రేవంత్ రెడ్డి ఉచిత కరెంట్ పై చేసిన వ్యాఖ్యలు సంచలనంగా మారడంతో తెలంగాణలో రచ్చ రచ్చ జరుగుతోంది. సొంత పార్టీ నేతలే ఆయన వ్యాఖ్యలను ఖండిస్తున్న సందర్భంలో హడావిడిగా రేవంత్ రెడ్డి అమెరికా నుంచి బయలుదేరారు. వాస్తవానికి ఈనెల 15న ఆయన బయలుదేరాల్సి ఉండగా.. ఈరోజే తిరుగుపయనం కావడం విశేషం.

మైలేజీనా..? డ్యామేజీనా..?

తానా సభల కోసం అమెరికా వెళ్లిన టీపీసీసీ చీఫ్ రేవంత్ రెడ్డి.. అక్కడ మీడియా ముందు చేసి వ్యాఖ్యలు సంచలనంగా మారాయి. సీతక్క సీఎం అభ్యర్థి అనే వ్యవహారం కూడా సొంత పార్టీలో చర్చనీయాంశమైంది. ఇక రైతులకు ఉచిత కరెంట్ పై రేవంత్ రెడ్డి చేసిన వ్యాఖ్యలు మొదటికే మోసం తెచ్చేలా ఉన్నాయి. 24 గంటల ఉచిత విద్యుత్ తో కంపెనీలకు సీఎం కేసీఆర్ అయాచిత లబ్ధి చేకూరుస్తున్నారని చెప్పడం రేవంత్ రెడ్డి ఉద్దేశం. అయితే ఆయన రైతులకు 3 గంటల విద్యుత్ సరిపోతుందని అనే సరికి బీఆర్ఎస్ శ్రేణులు భగ్గుమన్నాయి. అంటే రైతులకు 24 గంటల విద్యుత్ అవసరం లేదా అని ప్రశ్నించాయి. కాంగ్రెస్ స్టాండ్ అదేనా అని బోనులో నిలబెట్టాయి.

రేవంత్ వ్యాఖ్యలు తెలంగాణలో తీవ్ర సంచలనంగా మారాయి. కోమటిరెడ్డి వెంకట్ రెడ్డి వంటి సొంత పార్టీ నేతలే రేవంత్ ని టార్గెట్ చేశారు. ఎన్నికల వేళ బీఆర్ఎస్ కి రేవంత్ వ్యాఖ్యలు ప్రధాన అస్త్రంగా మారాయి. 3 పంటలు కావాలా..? 3 గంటలు కావాలా..? అంటూ మంత్రి కేటీఆర్ సూటిగా ప్రశ్నిస్తున్నారు. తెలంగాణలో కాంగ్రెస్ అధికారంలోకి వస్తే ధరణి తోపాటు ఉచిత కరెంట్ కూడా రద్దు చేస్తారని, రైతులు జాగ్రత్తగా ఉండాలని హెచ్చరించారు. ఎన్నికల ముందే కాంగ్రెస్ వైఖరి బయటపడిందని టార్గెట్ చేశారు బీఆర్ఎస్ నేతలు. పనిలో పనిగా బీజేపీ కూడా రాళ్లేయడం మొదలు పెట్టింది.

ఇంటా బయటా పోరు పెరగడంతో రేవంత్ రెడ్డి హడావిడిగా అమెరికానుంచి బయలుదేరారు. అక్కడినుంచి ఆయన వివరణ ఇస్తే, అది మరో రకంగా వైరల్ అయితే మరింత ప్రమాదం. అందుకే రేవంత్ రెడ్డి నేరుగా హైదరాబాద్ వస్తున్నారు. ప్రెస్ మీట్ పెట్టి ఆయన వివరణ ఇచ్చే అవకాశముందని తెలుస్తోంది.