పారా హుషార్...విద్యుత్ వినియోగదారులను టార్గెట్ చేస్తున్న‌సైబర్ మోసగాళ్లు

అనేక రకాల పద్దతుల ద్వారా సైబర్ మోసగాళ్ళు ప్రజల సొమ్మును కొల్లగొడుతున్నారు. ఇప్పుడు విద్యుత్ బిల్లులపై దృష్టి సారించారు. పెండింగ్‌ బిల్లులు క్లియర్‌ చేయాలనే సాకుతో విద్యుత్‌ బోర్డు ఉద్యోగులుగా నటిస్తూ వినియోగదారులను మోసగాళ్లు సంప్రదిస్తున్నారని, లేదంటే కరెంటు కోత తప్పదని బెదిరిస్తూ సొమ్ము కాజేస్తున్నారని హైదరాబాద్ లో ఇటీవల జరిగిన ఉదంతాలు తెలియజేస్తున్నాయి.

సైబర్ క్రైమ్ అధికారులు తెలిపిన వివరాల ప్రకారం, మోసగాడు మొదట లక్ష్యంగా చేసుకున్న వ్యక్తి మొబైల్ ఫోన్‌కు SMS లేదా వాట్సాప్ ద్వారా సందేశం పంపుతాడు. తరువాతి వారు స్పందించినప్పుడు, వారు తమను తాము స్థానిక విద్యుత్ బోర్డు ఉద్యోగులుగా పరిచయం చేసుకుంటారు. వినియోగదారుడు విద్యుత్ బిల్లులు చెల్లించలేదని, అందువల్ల‌ విద్యుత్ సరఫరా నిలిపివేయబడుతుందని తెలియజేస్తారు.

మోసగాడు వినియోగదారుడిని ఒత్తిడి చేస్తాడు, అతను సూచించే యాప్‌ను డౌన్‌లోడ్ చేయమని అడుగుతాడు. లావాదేవీ కోసం లింక్‌ను షేర్ చేస్తాడు. వారు తర్వాత తిరిగి కాల్ చేస్తామని బాధితుడికి చెప్తారు. ఆ తర్వాత వినియోగ దారుడి బ్యాంకు ఖాతాల నుండి సొమ్ము ఖాళీ అవుతుంది. ఇలా మోసగాళ్ల చేతిలో డబ్బు పోగొట్టుకున్న ఘటనలు హైదరాబాద్ లో ఇప్పటికే కొన్ని నమోదయ్యాయి.

ఒక వినియోగదారునికి 9531039190 మొబైల్ నంబర్ నుండి ‘ రాత్రి 10.30 గంటల వరకు మీ బిల్లు అప్‌డేట్ కానందున విద్యుత్ డిస్‌కనెక్ట్ చేయబడుతుంది. 9064579675 నెంబర్ లో విద్యుత్ కార్యాలయాన్ని సంప్రదించండి ’ అని పేర్కొంటూ మెసేజ్ వచ్చింది.

వినియోగదారుడు ఆ నంబర్‌ను డయల్ చేసినప్పుడు, ఒక వ్యక్తి తిరిగి కాల్ చేసి, గూగుల్ ప్లే స్టోర్ నుండి తాను సూచించిన యాప్‌ను డౌన్‌లోడ్ చేసి, చెల్లింపు చేయాలని బలవంతం చేశాడు. అయితే, వినియోగదారు దానిని డౌన్‌లోడ్ చేయడానికి నిరాకరించి మరిన్ని వివరాలను కోరడంతో మోసగాడు కాల్ వెంటనే డిస్‌కనెక్ట్ చేశారు.

సందేహించని వినియోగదారులు కొందరు లింక్‌ను డౌన్‌లోడ్ చేశారు. దాంతో వారి బ్యాంక్ ఖాతా లాగిన్ డిటైల్స్ ను యాక్సెస్ చేసి డబ్బును విత్‌డ్రా చేసుకున్నాడని సైబర్ క్రైమ్ అధికారి తెలిపారు.