క్రికెట్ పరిభాషలో తెలంగాణ ఎన్నికల ఫలితాలు

తెలంగాణ అసెంబ్లీ ఎన్నికల ఫలితాలు ఎలా ఉంటాయో క్రికెట్ పరిభాషలో చెప్పి నవ్వించారు మంత్రి హరీష్ రావు. కోరుట్లలో 100 పడకల ఆస్పత్రిని ప్రారంభించిన అనంతరం అక్కడ జరిగిన బహిరంగ సభలో పాల్గొన్నారు మంత్రి. బీఆర్ఎస్ హ్యాట్రిక్ విజయం ఖాయమని చెప్పారు. మీ అందరికీ అర్థమయ్యే క్రికెట్ భాషలో రిజల్ట్ చెబుతా వినండి అంటూ సరదాగా తన ప్రసంగాన్ని కొనసాగించారు హరీష్ రావు.

బీజేపీ డకౌట్, కాంగ్రెస్ రనౌట్

గత ఎన్నికల్లో చావు తప్పి కన్నులొట్టబోయినట్టుగా బీజేపీకి ఒకే ఒక్క సీటు వచ్చిందని, ఈసారి అది కూడా రాదని.. గ్యారెంటీగా బీజేపీ డకౌట్ అవుతుందన్నారు హరీష్ రావు. ఇక కాంగ్రెస్ రనౌట్ అవుతుందంటూ తనదైన శైలిలో వివరించారు. బాల్ గాలిలో ఉండగానే కాంగ్రెస్ పార్టీ రన్స్ తీయడానికి తహతహలాడుతోందని, అందుకే ఈ సారి ఆ పార్టీ రనౌట్ అవుతుందని చెప్పారు. బీఆర్ఎస్ హ్యాట్రిక్ గ్యారెంటీ అని, కేసీఆర్ సిక్సర్ కొట్టడం గ్యారెంటీ అని అన్నారు హరీష్ రావు.

పొలిటికల్ టూరిస్ట్ లు..

తెలంగాణపై కేసీఆర్ కి ఉన్నంత ప్రేమ ఇంకెవరికీ ఉండదన్నారు మంత్రి హరీష్ రావు. రాహుల్ గాంధీ, మోదీ.. పొలిటికల్ టూరిస్ట్ లు అంటూ ఎద్దేవా చేశారు. వారిద్దరూ తెలంగాణకు చుట్టపు చూపుగా వచ్చి పోతుంటారని, కానీ ఇక్కడే నిలబడేది కేసీఆర్ ఒక్కరేనని అన్నారు. తెలంగాణకు సీఎం కేసీఆర్ నాయకత్వమే శ్రీరామ రక్ష అని చెప్పారు హరీష్ రావు.