హిమాన్షు 'గోల్డెన్ అవర్'.. యూట్యూబ్ లో వైరల్
తన కుమారుడు పాడిన పాట తనకెంతో నచ్చిందని... అందరికీ నచ్చుతుందని ఆశిస్తున్నట్లు కేటీఆర్ ట్వీట్‌ చేశారు. 'గోల్డెన్ అవర్' పాటను ఆయన రీట్వీట్ చేశారు.
అకడమిక్ కార్యక్రమాల్లో చురుగ్గా ఉంటాడు, సోషల్ మీడియాలో కూడా యమా యాక్టివ్. మంత్రి కేటీఆర్ తనయుడు హిమాన్షు గురించి ఇప్పటి వరకూ మనకు తెలిసింది ఇదే. కానీ హిమాన్షు ఓ మంచి సింగర్. అతని సింగింగ్ టాలెంట్ ని తాజాగా ఓ కవర్ సాంగ్ తో బయట పెట్టాడు. 'గోల్డెన్ అవర్' అనే పాటకు కవర్ సాంగ్ రూపొందించి యూట్యూబ్ లో పోస్ట్ చేశాడు. ఈ పాట ఇప్పుడు వైరల్ గా మారింది. సోషల్ మీడియా అంతా ఈ పాట గురించే చర్చ.
అమెరికాకు చెందిన గాయకుడు, రచయిత జాకబ్‌ లాసన్‌ పాడిన ‘గోల్డెన్ అవర్’ సాంగ్ కు హిమాన్షు కవర్ సాంగ్ రూపొందించాడు. వెస్ట్రన్ యాక్సెంట్ లో ఈ పాటను అద్భుతంగా పాడాడంటూ పలువురి ప్రశంసలు అందుకుంటున్నాడు హిమాన్షు. తనలో దాగిఉన్న కొత్త టాలెంట్ ను వెలికి తీసినందుకు స్నేహితులు, అయాన్ పాట్ని, రుయాన్ లూథ్రాలకు స్పెషల్ థ్యాంక్స్ చెప్పాడు హిమాన్షు. ఈ వీడియోను ఎడిటింగ్ చేసిన దూలం సత్యనారాయణ, శ్రీకాంత్ పెండ్యాల టీమ్ కు ధన్యవాదాలు తెలిపాడు.
అల్లుడూ నువ్వు సూపర్..
హిమాన్షు కవర్ సాంగ్ కి చాలామంది ప్రశంసలు లభించాయి. వారందరికీ తన ట్విట్టర్ అకౌంట్ ద్వారా ధన్యవాదాలు తెలిపాడు హిమాన్షు. మేనల్లుడి ప్రతిభ చూసి ఎమ్మెల్సీ పొంగిపోయారు. ‘నిన్ను చూసి గర్వపడుతున్నా అల్లుడూ! మరిన్ని మంచి పాటలు నీ నుంచి ఆశిస్తున్నా. దైవానుగ్రహం నీకుండాలి’’ అని కవిత ట్వీట్‌ చేశారు.
పుత్రోత్సాహం..
తన కుమారుడు పాడిన పాట తనకెంతో నచ్చిందని... అందరికీ నచ్చుతుందని ఆశిస్తున్నట్లు కేటీఆర్ ట్వీట్‌ చేశారు. 'గోల్డెన్ అవర్' పాటను ఆయన రీట్వీట్ చేశారు. సోషల్ మీడియాలో చాలామంది హిమాన్షు పాటను షేర్ చేస్తున్నారు.
