కేసీఆర్ పేరు కనపడకుండా చేస్తా..సీఎం రేవంత్ షాకింగ్ కామెంట్స్

తెలంగాణ సీఎం రేవంత్‌రెడ్డి సంచలన వ్యాఖ్యలు చేశారు. ఒక సంవత్సరం తర్వాత బీఆర్‌ఎస్ అధినేత కేసీఆర్ అనే పదమే కనపడకుండా చేస్తామని రేవంత్ అన్నారు. ఏడాది తరువాత కేసీఆర్ రాజకీయం ముగుస్తుందని కేటీఆర్‌తోనే కేసీఆర్ ను మర్చిపోయేలా చేశామని, ఇక హరీశ్ రావు ను వాడి కేటీఆర్ ను రాజకీయంగా లేకుండా చేస్తామని ముఖ్యమంత్రి షాకింగ్ కామెంట్స్ చేశారు. మూసీ ప్రాజెక్టుపై వెనక్కి తగ్గేది లేదని.. నవంబర్‌ ఒకటో తేదీన పనులు ప్రారంభించనున్నట్లు సీఎం తెలిపారు. పున‌ర్జీవ ప్రాజెక్టులో భాగంగా తొలిద‌శ‌లో బాపూఘాట్ అభివృద్ధి చేస్తామన్నారు. మొదటి దశలో గండిపేట నుంచి బాపూఘాట్ వ‌ర‌కు ప‌నులు చేపడుతామన్నారు. ప్రపంచంలోనే అతి పెద్ద గాంధీ విగ్రహాన్ని బాపూఘాట్‌లో నెలకొల్పుతామన్నారు.

కేబుల్ బ్రిడ్జి, బ‌రాజ్ ఏర్పాటు చేస్తామన్నారు. మల్లన్న సాగర్ నుంచి రూ.7వేలకోట్లతో నీటిని ఉస్మాన్‌ సాగ‌ర్‌కు మళ్లిస్తామన్నారు. అక్కడి నుంచి హిమాయ‌త్ సాగ‌ర్‌కు పంపుతామన్నారు. ట్రంక్‌లైన్‌ కోసం వ‌చ్చే నెల‌లో టెండ‌ర్లు పిలుస్తారన్నారు. బాపూఘాట్ వద్ద ఎస్టీపీల‌తో నీటిని శుద్ధి చేసి మూసీలోకి వదులుతామన్నారు. ముఖ్యమంత్రి అవ్వాలనుకున్న నా కల నెరవేరింది. సీఎం పోస్టు కంటే పెద్ద కలలు నాకు వేరే ఏమీ లేవన్నారు. దీపావళి పండగ అంటే చిచ్చు బుడ్లను చూస్తాం కానీ.. కేటీఆర్ బామ్మర్ది ఫామ్ హౌస్ లో సారా బుడ్లను చూడాల్సి వస్తోందన్నారు. రాజ్ పాకాల ఇంట్లో క్యాసినో కాయిన్స్ దొరికాయని అలాంటప్పుడు దాన్ని దీపావళి పార్టీ అని ఎలా అంటారన్నారని ముఖ్యమంత్రి అన్నారు.