త్వరలో జమిలి ఎన్నికలు..వచ్చేది బీఆర్‌ఎస్ ప్రభుత్వమే : ఎర్రబెల్లి

దేశంలో జమిలి ఎన్నికలు రాబోతున్నాయని మాజీ మంత్రి, బీఆర్ఎస్ సీనియర్ నేత ఎర్రబెల్లి దయాకర్ రావు ఆసక్తికర వ్యాఖ్యలు చేశారు. బీఆర్‌ఎస్ పార్టీ నిర్వహిస్తున్న దీక్షా దివస్ సందర్భంగా వరంగల్‌లో ఆయన మాట్లాడారు. బీఆర్ఎస్ శ్రేణులు అధైర్యపడవద్దని... కేసీఆర్ మరోసారి ముఖ్యమంత్రి అవుతారన్నారని తెలిపారు. రాష్ట్రంలో కాంగ్రెస్ పార్టీకి ఓటేసినందుకు ప్రజలు చాలా బాధపడుతున్నారన్నారు. వన్ నేషన్ వన్ ఎలక్షన్‌లో జమిలి ఎన్నికలు వస్తున్నాయని... అప్పుడు కాంగ్రెస్ పార్టీకి కనీసం డిపాజిట్లు కూడా రావని ఎద్దేవా చేశారు. బీఆర్‌ఎస్ ప్రభుత్వమే వస్తుందని ధీమా వ్యక్తం చేశారు.

రాబోయే ఎన్నికల్లో ప్రజలు ఓట్ల రూపంలో సీఎం రేవంత్ రెడ్డికి బుద్ధి చెప్పడం ఖాయమన్నారు. తెలంగాణ ఉద్యమ చరిత్రను మలుపు తిప్పిన రోజు దీక్షా దివస్ నిర్వహిస్తున్నామని అన్నారు. ప్రత్యేక రాష్ట్రం కోసం ప్రాణాలను ఫణంగా పెట్టిన వ్యక్తి కేసీఆర్‌ అని తెలిపారు. తెలంగాణను అద్భుతంగా అభివృద్ధి చేసిన నాయకుడు కేసీఆర్‌ అని కొనియాడారు. తెలంగాణ బిడ్డలపై తుపాకీ పట్టుకుని తిరిగి.. నేడు తుపాకీరాముడు ముచ్చట్లు చెబుతున్నారని మాజీ మంత్రి ఎర్రబెల్లి మండిపడ్డారు. త్వరలోనే తుపాకీ రాముడి తుప్పును ప్రజలు వదలగొడతారని విమర్శించారు.