తెలంగాణలో నేటినుంచి గ్రామ సభలు..

తెలంగాణలో ప్రభుత్వం మారిన తర్వాత తమ మార్కు చూపించాలని ఉవ్విళ్లూరుతోంది అధికార కాంగ్రెస్ పార్టీ. ముందుగా గ్రామ సభలు నిర్వహించి ప్రజా పాలన దరఖాస్తులు తీసుకున్నారు. ఇప్పుడు గ్రామసభలతో స్థానిక సమస్యలు తెలుసుకునే ప్రయత్నం చేస్తున్నారు నేతలు. ఈ గ్రామ సభలు ఈరోజు నుంచే ప్రారంభం కాబోతున్నాయి. ఈనెల 27 వరకు ఈ సభలు జరుగుతాయి.

ఏమేం చర్చిస్తారు..?

రాష్ట్రవ్యాప్తంగా బుధవారం నుంచి అన్ని గ్రామ పంచాయతీల్లో గ్రామసభలు నిర్వహించాలని తెలంగాణ ప్రభుత్వం ఆదేశించింది. గ్రామ పంచాయతీల అవసరాలపై ప్రణాళికలు రూపొందించడానికి పీపుల్స్‌ ప్లాన్‌ క్యాంపెయిన్‌ (పీపీసీ)లో భాగంగా ఈ సభలు జరుగుతాయంటున్నారు అధికారులు. ఈ మేరకు పంచాయతీరాజ్‌ శాఖ డైరెక్టర్‌ హన్మంతరావు జిల్లాల అదనపు కలెక్టర్లు, జడ్పీ సీఈవోలు, డీపీవోలకు ఆదేశాలు జారీ చేశారు. గ్రామ పంచాయతీ డెవలప్మెంట్ ప్లాన్ లను ఈ గ్రామ సభల్లో ఆమోదిస్తారు.

2023-24 సంవత్సరంలో అందుబాటులో ఉన్న నిధులతో చేపట్టే పనుల గురించి ఈ గ్రామ సభల్లో చర్చిస్తారు. అదే సమయంలో 2024-25 ఆర్థిక సంవత్సరంలో గ్రామ అవసరాలకు ప్రాధాన్య క్రమంలో పనులను నిర్ణయిస్తారని అంటున్నారు. కేంద్ర ప్రభుత్వం రూపొందించిన సబ్‌ కీ యోజన- సబ్‌ కా వికాస్‌లో భాగంగా ఈ కార్యక్రమాన్ని రాష్ట్ర ప్రభుత్వం చేపడుతోంది.