దళిత బంధు, WE‍హబ్ కలిసి ఆ మహిళలను వ్యాపారవేత్తలుగా నిలబెట్టాయి

దళిత బంధు, భారతదేశంలోనే అతిపెద్ద ప్రత్యక్ష ప్రయోజన బదిలీ పథకం. తెలంగాణ మొత్తం జనాభాలో 17.5 శాతంగా ఉన్న షెడ్యూల్ కుల సమాజంలో ఈ పథకం ద్వారా పేదరికాన్ని నిర్మూలించడమే లక్ష్యంగా పెట్టుకుంది ప్రభుత్వం. ఈ పథకం అర్హతగల ఎస్సీ అభ్యర్థులకు రూ.10 లక్షల వన్-టైమ్ సబ్సిడీని మంజూరు చేస్తుంది.

ఒక్క కరీంనగర్‌లోనే 343 మంది మహిళలు రాష్ట్ర ప్రభుత్వం ఇచ్చిన దళిత బంధు గ్రాంట్‌తో పరిశ్రమలు స్థాపించారు. WE-Hub, స్టేట్ సపోర్ట్ ఫర్ ఉమెన్ బిజినెస్ ఇంక్యుబేటర్ ఆ మహిళల‌ వ్యాపార ఆలోచనను అర్థం చేసుకోవడానికి, వ్యాపార సాధ్యా సాధ్యాలను అంచనా వేయడానికి, కోర్ ప్రాజెక్ట్ రిపోర్ట్‌లను అభివృద్ధి చేయడానికి వారితో అనేక సార్లు సమావేశమయ్యింది. చర్చించింది .ఇది వ్యాపారం యొక్క సూక్ష్మ నైపుణ్యాలను అర్థం చేసుకోవడానికి, వ్రాతపనిని పూర్తి చేయడానికి సహాయపడింది.

ఉదాహరణకు, నీరేటి మౌనిక, అంతకుముందు ఆమె ఆదాయం కోసం ట్యూషన్లు చెప్పేది. ఇప్పుడామె పిల్లల బట్టల‌ దుకాణాన్ని ఏర్పాటు చేసింది. అలాగే ఆమె భర్త కోసం ఓ టాక్సీ కొనుగోలు చేసింది. ఇప్పుడు, ఆమె తన సొంత వెంచర్ మౌనిక కంప్యూటర్ ఎంబ్రాయిడరీ, స్టేషనరీ ప్రారంభించడంతో రెండు నెలల్లోనే నెలకు రూ.10,000 సంపాదిస్తోంది. అంతకు ముందు ఆమె టూషన్ల ద్వారా నెలకు రూ.4,000 మాత్రమే సంపాదించగలిగేది.

హుజూరాబాద్‌కు చెందిన వేల్పుల శారద తన ఇంటి ముందు భాగంలో నాన్‌వోవెన్ క్యారీ బ్యాగ్ తయారీ యూనిట్‌ను ఏర్పాటు చేసేందుకు మరో దళిత బంధు లబ్ధిదారుడితో చేతులు కలిపింది. యూనిట్ రోజుకు 1,000 కిలోల బస్తాలను తయారు చేయగలదు. శారద ప్రారంభించిన ఈ వెంచర్ ఆమె పిల్లలకు కూడా ఉపాధిని తెచ్చిపెట్టింది. వారు ఇప్పుడు వ్యాపారంలోని వివిధ భాగాలను చూసుకుంటున్నారు.

శారద చీరల కేంద్రం లేదా కిరాణా దుకాణం ఏర్పాటు చేయాలని భావించింది. WE-Hubతో సమావేశం తర్వాత, ఆమె, ఆమె కుటుంబం తయారీ యూనిట్ యొక్క ప్రయోజనాలను గ్రహించారు. ఈ ప్రాంతంలో ప్లాస్టిక్ నిషేధం నాన్ ఓవెన్ బ్యాగుల తయారీ యూనిట్‌ను ప్రారంభించేందుకు వారిని ప్రేరేపించింది. ఇంతకుముందు నెలవారీ కుటుంబ ఆదాయం రూ.25,000 ఉండేది. ఆమె కుటుంబం ఇప్పుడు నెలకు రూ.45,000-50,000 సంపాదిస్తోంది.

కంకుర్తి మాధురి, ఆమె భర్త రోడ్డు విస్తరణతో చెప్పుల షాప్ కోల్పోయారు. WE-Hubతో సమావేశం తర్వాత వ్యాపారం కోసం వాణిజ్య స్థలాన్ని అద్దెకు తీసుకోవడం యొక్క ప్రాముఖ్యతను ఆమెకు అర్థమయ్యేలా చేసింది. ప్రస్తుతం వీరిద్దరూ జమ్మికుంటలో పాదరక్షల దుకాణం నిర్వహిస్తున్నారు. దుకాణాన్ని ఏర్పాటు చేసిన తర్వాత ఆమె కుటుంబ ఆర్థిక స్థితి మెరుగుపడింది.

కేశవపట్నంకు చెందిన పత్రి రాధ లేడీస్ ఎంపోరియం ఏర్పాటు చేసింది. మరో సభ్యురాలు విజయ కరీంనగర్‌లో చీరల దుకాణం నిర్వహిస్తున్నారు. వారు తమ కాళ్ళ మీద తాము నిలబడినందుకు సంతోషంగా ఉన్నారు. అనేక సందర్భాల్లో వీరు ప్రారంభించిన వ్యాపారాల వల్ల వారి ఆదాయ మార్గాలు 100 శాతం కంటే ఎక్కువ పెరగి వారి జీవన ప్రమాణాలను మెరుగుపరిచాయి.

కాగా సుమారు నాలున్నర‌ సంవత్సరాలుగా పనిచేస్తున్న WE హబ్ ఇప్పటివరకు సుమారు 4,000 మంది గ్రామీణ మహిళా పారిశ్రామికవేత్తలతో కలిసి పనిచేసింది. 127 మంది మహిళా పారిశ్రామికవేత్తలకు రుణాలు మంజూరు చేయబడిన రామగుండంలో WE హబ్ అద్భుత పని విధానం వల్ల అక్కడ మహిళా వ్యాపారులు నిలదొకుకున్నారు. ఇప్పుడు కరీంనగర్ జిల్లా యంత్రాంగం హుజూరాబాద్‌లో దళిత బందును అమలు చేయడానికి WE-హబ్‌ను ప్రారంభించింది.

ఇక్కడ WE-Hub మూడు నెలల పాటు కార్యక్రమాలు నిర్వహించింది. మొదటి రౌండ్ ఓరియంటేషన్‌లో, దళిత బంధు కోసం ఎంపిక చేసిన 790 మంది ఎస్సీ మహిళలతో సమావేశాలు నిర్వహించి వాళ్ళ అభిరుచులు, ఏ వ్యాపారాల్లో వాళ్ళకు ఇంట్రస్ట్ ఉంది. వాళ్ళ నైపుణ్యాలు, చొరవ తదితర విషయాలను అంచనా వేసింది. వీరిలో 343 మంది మహిళలు తమ యూనిట్లను ప్రారంభించేందుకు ఆసక్తి చూపారు. వారి వ్యాపార ఆలోచనలను అర్థం చేసుకోవడానికి, వారి వ్యాపార సాధ్యాసాధ్యాలను అంచనా వేయడానికి వారితో ఒక్కొక్కరితో సమావేశాలు నిర్వహించింది WE-Hub. 7-దశల ప్రక్రియ ద్వారా మహిళలకు మార్గనిర్దేశం చేశారు.

లొకేషన్ ఎంపిక‌, డాక్యుమెంటేషన్, రిజిస్ట్రేషన్లు, లైసెన్స్‌లను పొందడంలో మద్దతు, మెషినరీ కొనుగోలు కోసం విక్రేతలతో కనెక్ట్ అవ్వడం, విక్రేతల నుండి కొటేషన్‌లు పొందడం, కొటేషన్‌ల ధృవీకరణ, ఆమోదం వంటి వాటిన్నింటిలో WE-Hub మహిళా వ్యాపారులకు సహకరించింది.

"ప్రభుత్వ పథకం యొక్క లక్ష్యాలను చేరుకోవడానికి ఒక సమగ్ర విధానం అవసరమని స్పష్టంగా తెలుస్తుంది. ప్రత్యక్ష నగదు బదిలీ పథకాలతో ఈ అవసరం మరింత ఎక్కువగా ఉంటుంది. స్కీమ్‌ని పొందడం నుండి వ్యాపారాన్ని ప్రారంభించడం వరకు వారికి అన్ని రకాల సహాయ సహకారాలు అవసరం. వారు విజయవంతమవుతారనే విశ్వాసం కలిగించడం చాలా ముఖ్యం. " అని WE-హబ్ చీఫ్ ఎగ్జిక్యూటివ్ ఆఫీసర్ దీప్తి రావుల అన్నారు.