'బొగ్గు క్షేత్రాల వేలం సింగరేణికి మరణశాసనం'

సింగరేణి కాలరీస్ కంపెనీ లిమిటెడ్ (SCCL) ఆధ్వర్యంలోని బొగ్గు బ్లాకులను వేలం వేయాలన్న బిజెపి నేతృత్వంలోని కేంద్ర ప్రభుత్వం నిర్ణయం సింగరేణి కంపెనీకి మరణ సాసనం అవుతుందని తెలంగాణ ప్లానింగ్ బోర్డ్ వైస్ చైర్మన్ బి వినోద్ కుమార్ అన్నారు.

''ప్రస్తుత మైనింగ్ లీజు ప్రాంతాల వెలుపల, గోదావరి లోయ బొగ్గు క్షేత్రం (GVCF) లోపల నామినేషన్ ప్రాతిపదికన SCCL కు బ్లాకులను కేటాయించకపోవడం వల్ల ఏర్పడే ప్రతికూల ప్రభావం దేశంలోని కొన్ని ప్రాంతాలలో ఉన్న థర్మల్ పవర్ స్టేషన్‌లకు బొగ్గు కొరతకు దారి తీస్తుంది. దీనివల్ల రాబోయే ఐదు నుండి 10 సంవత్సరాలలో గనులలో నిల్వలు అయిపోయి ఓపెన్ కాస్ట్, భూగర్భ గనులు మూసివేయబడతాయి. ఫలితంగా వార్షిక ఉత్పత్తి సామర్థ్యం తగ్గుతుంది''అని ఆయన అన్నారు.

టన్ను ఉత్పత్తి వ్యయం కూడా పెరుగుతుందని, వార్షిక టర్నోవర్, లాభాలు తగ్గుతాయని వినోద్ కుమార్ ఒక ప్రకటనలో తెలిపారు. చివరకు ఆ సంస్థ ఆర్థికంగా నష్టాల్లో కూరుకుపోతుంది. మరీ ముఖ్యంగా, కంపెనీలో మానవ వనరుల అవసరం తగ్గుతుందని, ఇది సమాజంపై తీవ్ర ప్రభావాన్ని చూపిస్తుందని ఆయన అన్నారు.

GVCF బొగ్గు బ్లాకులను ప్రైవేటీకరించడం వల్ల కలిగే ప్రభావాన్ని వివరిస్తూ, ప్రస్తుత పరిస్థితుల్లో ఓపెన్‌కాస్ట్ ప్రాజెక్టుల నిర్వహణ ఆర్థికంగా లాభదాయకంగా ఉందన్నారు. దీనికి విరుద్ధంగా, భూగర్భ మైనింగ్ పర్యావరణ అనుకూలమైనప్పటికీ ఆర్థికంగా లాభదాయకం కాదు. ఓపెన్ కాస్ట్ ప్రాజెక్టుల నుంచి 85 శాతం ఉత్పత్తి ఎక్కువగా ఉండడంతో భూగర్భ గనుల్లో ఏర్పడిన నష్టాలను భర్తీ చేయడం ద్వారా సింగరేణి (SCCL) లాభాలను ఆర్జిస్తోందని ఆయన వివరించారు.

SCCL పరిధిలోని బొగ్గు బ్లాకులను వేలానికి పెట్టడంపై బిజెపి ప్రభుత్వంపై విమర్శలు గుప్పించిన ఆయన సింగరేణిని నిర్వీర్యం చేసి కంపెనీని వ్యూహాత్మకంగా ప్రైవేటీకరించే కుట్ర అని ఆరోపించారు.

"ఈ వేలం గురించి ప్రధానమంత్రి మరియు బిజెపి రాష్ట్ర అధ్యక్షుడు బండి సంజయ్ ఏమి చెప్పారు?" తెలంగాణ సంక్షేమం, అభివృద్ధికి ఇక్కడి బీజేపీ నేతలు కట్టుబడి ఉంటే ఇలాంటి కుట్రలను మానుకోవాలని కేంద్ర ప్రభుత్వంపై ఒత్తిడి తేవాలని కోరారు.