51 మంది అభ్యర్థులకు బీఫామ్స్ అందించిన సీఎం కేసీఆర్

తెలంగాణ అసెంబ్లీ ఎన్నికల్లో పోటీ చేయనున్న బీఆర్ఎస్ అభ్యర్థులకు సీఎం కేసీఆర్ బీ-ఫామ్స్ అందించారు. ఆదివారం తెలంగాణ భవన్‌లో బీఆర్ఎస్ అభ్యర్థులకు పార్టీ అధ్యక్షుడు, సీఎం కేసీఆర్ దిశానిర్దేశం చేశారు. తొలి విడతగా 51 మందికి బీఫామ్స్ అందిస్తున్నట్లు కేసీఆర్ చెప్పారు. నిన్నటి వరకు ముహూర్తాలు సరిగా లేకపోవడంతో.. ఈ రోజు ఉదయమే 51 ఫామ్స్ మీద తాను సంతకాలు చేశానని అన్నారు. సమయాభావం కారణంగానే తొలుత 51 మందికి అందిస్తున్నామని పేర్కొన్నారు.

కేసీఆర్ తరపున బీ ఫామ్‌ను గంపా గోవర్ధన్ అందుకున్నారు. మంత్రి ప్రశాంత్ రెడ్డి తరపున ఎమ్మెల్సీ కవితకు బీ-ఫామ్ అందించారు. ఇక తొలి రోజు బీఫామ్ అందుకున్న వారిలో ఉమ్మడి మెదక్, మహబూబ్‌నగర్, ఖమ్మం, నిజామాబాద్, ఆదిలాబాద్ జిల్లాలకు చెందిన అభ్యర్థులు ఉన్నారు. వీరికి బీఫామ్‌తో పాటు ఎన్నికల ఖర్చు నిమిత్తం ఒక్కొక్కరికి రూ.40 లక్షల చెక్కును కూడా పార్టీ తరపున అందించారు. మిగిలిన వారికి రేపటి నుంచి ప్రగతి భవన్‌లో బీఫామ్స్ అందిస్తారు.

తొలి రోజు బీఫామ్స్ అందుకున్న వారిలో పోచారం శ్రీనివాస్ రెడ్డి, షకీల్, జాజ సురేందర్, గణేష్ గుప్తా, బాజిరెడ్డి గోవర్ధన్ రెడ్డి, గంపా గోవర్ధన్ (కేసీఆర్ కోసం), రాజేందర్ రెడ్డి, శ్రీనివాస్ రెడ్డి, లక్ష్మారెడ్డి, ఆల వెంకటేశ్వర్ రెడ్డి, చిట్టెం రామ్మోహన్ రెడ్డి, నిరంజన్ రెడ్డి, బండ్ల కృష్ణమోహన్ రెడ్డి, మర్రి జనార్థన్ రెడ్డి, గువ్వల బాలరాజు, జైపాల్ యాదవ్, అంజయ్య యాదవ్, హర్షవర్ధన్ రెడ్డి, పద్మా దేవేందర్ రెడ్డి, చంటి క్రాంతి కిరణ్, మహిపాల్ రెడ్డి, కొత్త ప్రభాకర్ రెడ్డి, రేగా కాంతారావు, హరిప్రియా నాయక్, పువ్వాడ అజయ్ కుమార్, లింగాల కమల్‌రాజ్, సండ్ర వెంకటవీరయ్య, వనమా వెంకటేశ్వరావు, మెచ్చా నాగేశ్వరరావు తదితరులు ఉన్నారు.