అల్లు అర్జున్ కి కేసీఆర్ ప్రత్యేక శుభాకాంక్షలు
69 ఏళ్లలో మొదటిసారి తెలుగు హీరోకి ఉత్తమ నటుడిగా జాతీయ అవార్డు దక్కడం గొప్ప విషయం అన్నారు సీఎం కేసీఆర్. నాటితరం గొప్ప నటుడు అల్లు రామలింగయ్య వారసుడిగా, చిరంజీవి వంటి వారి స్ఫూర్తితో నేటితరం నటుడిగా స్వశక్తితో ఎదిగిన అల్లు అర్జున్ కృషి గొప్పదని అభినందించారు. తెలుగుతోపాటు జాతీయ, అంతర్జాతీయ ప్రేక్షకుల్ని కూడా అల్లు అర్జున్ అలరించారని చెప్పారు. ఆయనకు దక్కిన అవార్డు తెలుగు చిత్ర రంగానికి గర్వకారణం అని కొనియాడారు సీఎం కేసీఆర్.
సృజనాత్మక రచనతో సినీ పాటల సాహిత్యానికి ప్రపంచస్థాయి గుర్తింపు తెచ్చిన ఆస్కార్ అవార్డు గ్రహీత చంద్రబోస్ కు ఇప్పుడు జాతీయ అవార్డు దక్కడం పట్ల సీఎం కేసీఆర్ హర్షం వ్యక్తం చేశారు. చంద్రబోస్ కు శుభాకాంక్షలు తెలిపారు. ఉత్తమ సంగీత దర్శకుడు దేవిశ్రీ ప్రసాద్, ఉత్తమ ప్లేబ్యాక్ సింగర్ కాలభైరవ, ఉత్తమ సినీ విమర్శకుడు పురుషోత్తమాచార్యులతో పాటు.. ఇతర విభాగాల్లో జాతీయ అవార్డులు పొందిన సినిమాల నిర్మాతలు, దర్శకులు, నటులు, సాంకేతిక సిబ్బందికి కేసీఆర్ అభినందనలు తెలిపారు.
తెలుగు చలన చిత్ర రంగం హైదరాబాద్ కేంద్రంగా జాతీయ, అంతర్జాతీయ స్థాయిలో తన ప్రతిభ చాటడం గొప్ప విషయం అని అన్నారు సీఎం కేసీఆర్. నిర్మాణ రంగంలో తెలుగు సినిమా దేశానికి ఆదర్శంగా నిలిచిందన్నారు. రాష్ట్ర ప్రభుత్వ ప్రోత్సాహంతో తెలుగు సినిమా ఇతర భారతీయ సినిమా రంగాలతో పోటీపడుతోందని చెప్పారు. తెలుగు చిత్ర రంగం అభివృద్ధికోసం రాష్ట్ర ప్రభుత్వం తన వంతు కృషి కొనసాగిస్తుంటుందని స్పష్టం చేశారు. విభిన్న సంస్కృతుల మేళవింపుతో భవిష్యత్తులో తెలుగు సినిమా విశ్వవ్యాప్తంగా మరింతగా విస్తరించాలని ఆకాంక్షించారు సీఎం కేసీఆర్.
