తెలంగాణలో టెన్త్‌ క్లాస్‌ మార్కుల విధానంలో మార్పులు

తెలంగాణలో టెన్త్‌ క్లాస్‌ మార్కుల విధానంలో రాష్ట్ర ప్రభుత్వం కీలక మార్పులు చేసింది. ప్రస్తుతం పదో తరగతిలో 20 ఇంటర్నల్‌ మార్కులు, 80 మార్కులకు ఫైనల్‌ పరీక్షలు నిర్వహిస్తున్న సంగతి తెలిసిందే. ఈసారి ఇంటర్నల్‌ మార్కుల విధానాన్ని ప్రభుత్వం పూర్తిగా రద్దు చేసింది. ఇకపై 100 మార్కులకు ఫైనల్‌ పరీక్షలు జరనున్నాయి. 2024-25 విద్యా సంవత్సరం నుంచి ఈ కొత్త విధానం అమల్లోకి వస్తుందని విద్యాశాఖ ఉత్తర్వుల్లో పేర్కొన్నది. ఈ మార్పులకు అనుగుణంగా పరీక్షలు జరిగే సమయంలో విద్యార్థులకు ఇచ్చే ఆన్సర్‌ షీట్స్‌లోనూ సర్కార్‌ మార్పులు చేసింది. ఫిజిక్స్‌, బయాలజి సబ్జెక్టులకు 12 పేజీల ఆన్సర్‌ బుక్‌లెట్స్‌ ఇవ్వనున్నది. మిగతా సబ్జెక్టులకు 24 పేజీల ఆన్సర్‌ బుక్‌లెట్స్‌ ఇవ్వాలని నిర్ణయం తీసుకున్నది. ఈ మేరకు విద్యార్థులకు సమాచారం ఇవ్వాలని అన్నిజిల్లాల విద్యాశాఖ అధికారులకు విద్యాశాఖ ఆదేశాలు జారీ చేసింది.