ఉద్యోగుల సమస్యల పరిష్కారానికి కేబినెట్‌ సబ్‌ కమిటీ
డిప్యూటీ సీఎం మల్లు భట్టి విక్రమార్క నేతృత్వంలో కమిటీ ఏర్పాటు
రాష్ట్ర ప్రభుత్వ ఉద్యోగులు, పెన్షనర్ల సమస్యల పరిష్కారానికి కేబినెట్‌ సబ్‌ కమిటీ ఏర్పాటు చేసింది. శుక్రవారం ఈమేరకు ఉత్తర్వులు ఇచ్చింది. డిప్యూటీ సీఎం మల్లు భట్టి విక్రమార్క చైర్మన్‌ గా ఉన్న ఈ కమిటీలో మంత్రులు దుద్దిళ్ల శ్రీధర్‌ బాబు, పొన్నం ప్రభాకర్‌, ప్రభుత్వ సలహాదారు కె. కేశవరావు ను సభ్యులుగా నియమించారు. జీఏడీ (సర్వీసెస్‌) ప్రిన్సిపల్‌ సెక్రటరీ కమిటీకి మెంబర్‌ కన్వీనర్‌ గా వ్యవహరిస్తారు. అన్ని శాఖల స్పెషల్‌ సీఎస్‌ లు/ప్రిన్సిపల్‌ సెక్రటరీలు ఈ సబ్‌ కమిటీని నిర్వహించే సమావేశాలకు హాజరుకావాలని ఉత్తర్వుల్లో ఆదేశించారు. ఇటీవల రాష్ట్ర ప్రభుత్వ ఉద్యోగుల జేఏసీ నేతలతో సీఎం రేవంత్‌ రెడ్డి పోలీస్‌ కమాండ్‌ కంట్రోల్‌ సెంటర్‌ లో సమావేశమయ్యారు. ఈ సమావేశంలో ఆయా సంఘాల నేతలు లేవనెత్తిన అంశాలు, వారు ఎదుర్కొంటున్న సమస్యల పరిష్కారానికి కేబినెట్‌ సబ్‌ కమిటీ ఏర్పాటు చేస్తామని సీఎం అదే రోజు హామీ ఇచ్చారు. ఆ హామీలో భాగంగా శుక్రవారం కమిటీ ఏర్పాటు చేశారు. రేవంత్‌ రెడ్డి సీఎం అయ్యాక అనేక అంశాలపై నిర్ణయాలు తీసుకునేందుకు పదికి పైగా కేబినెట్‌ సబ్‌ కమిటీలు ఏర్పాటు చేశారు. ఏ ఒక్క కమిటీ పూర్తి స్థాయి నివేదిక ఇవ్వలేదు. ఉద్యోగుల డిమాండ్లను కమిటీ పేరుతో కాలయాపన చేయాలనే ప్రభుత్వం చూస్తోందన్న ఆరోపణలు ఉన్నాయి.
