భారత్ పరివర్తనే బీఆర్ఎస్ మిషన్ ‍- కేసీఆర్

భారత రాష్ట్ర సమితి (బీఆర్‌ఎస్) 'భారత్ పరివర్తన్ మిషన్'ను చేపడుతుందని, అందులో భాగంగా దేశ జల విధానంలో సమూల‌ మార్పును తీసుకువస్తుందని బీఆర్ఎస్ జాతీయ అధ్యక్షులు కేసీఆర్ అన్నారు. వ్యవసాయానికి ప్రతి ఎకరాకు నీరు అందేలా, దేశవ్యాప్తంగా ఇంటింటికీ తాగునీరు వీలైనంత త్వరగా అందించేలా అన్ని చర్యలు తీసుకుంటామని కేసీఆర్ తెలిపారు.

తెలంగాణ భవన్ లో బీఆర్ఎస్ ఆవిర్భావ దినోత్సవం సందర్భంగా జరుగుతున్న బీఆర్ఎస్ ప్రతినిధుల సభలో మహారాష్ట్ర నేతలను ఉద్దేశించి కేసీఆర్ మాట్లాడుతూ.. దేశంలోని రైతాంగాన్ని ఇబ్బంది పెడుతున్న రెండు సమస్యలు నీరు, విద్యుత్ అని పేర్కొన్నారు. దేశంలో సమృద్ధిగా నీరు ఉన్న‌ప్పటికీ, రైతులకు సరిపడా నీటిని అందించడంలో అన్నికేంద్ర ప్రభుత్వాలు విఫలమయ్యాయని అన్నారు.

దేశంలో వ‌ర్షాలు కురిసిన తర్వాత దాదాపు 75,000 టిఎంసిల నీరు నదుల ద్వారా ప్రవహిస్తుంది. కేంద్ర ప్రభుత్వ నిర్లక్ష్యం కారణంగా నీరంతా సముద్రంలో కలుస్తోంది. ఏ కర్మాగారంలో నీటిని తయారు చేయడం సాధ్యం కాదు. ఈ సమస్యను పరిష్కరించడానికి భారతదేశం రష్యా లేదా యునైటెడ్ స్టేట్స్ ముందు అడుక్కోవలసిన అవసరం లేదు. ఈ సమస్యలను పరిష్కరించేందుకు సరైన దృక్పథం అవసరమని కేసీఆర్ అన్నారు.

గోదావరి నదికి ఆనుకుని ఉన్న గడ్చిరోలి ప్రాంతంలో నీటి కొరత ఉందని, అందుకు ఎవరు బాధ్యత వహించాలని కేసీఆర్ ప్రశ్నించారు. ఇప్పుడు మహారాష్ట్రలో అధికారంలో ఉన్న ‘కిచిడీ సర్కార్’ నుండి తమను రక్షించాలని మహారాష్ట్రలోని వివిధ ప్రాంతాల ప్రజల నుండి విజ్ఞప్తులు వస్తున్నాయని ఆయన అన్నారు.

మే 7 నుండి జూన్ 7 వరకు, మహారాష్ట్రలోని మొత్తం 288 అసెంబ్లీ నియోజకవర్గాల్లో BRS పార్టీ సభ్యత్వ డ్రైవ్‌లు నిర్వహిస్తామని కేసీఆర్ తెలిపారు. యువత, మహిళలు తదితరుల కోసం ప్రత్యేక కమిటీలను ఏర్పాటు చేసి రాష్ట్రంలో 10 లక్షల నుంచి 12 లక్షల మంది కార్యకర్తలతో భారీ ర్యాలీ నిర్వహించి బీఆర్‌ఎస్‌ బలాన్ని చాటుతామని ముఖ్యమంత్రి కేసీఆర్ చెప్పారు.