స్కూల్ గేటు మీద పడి విద్యార్థి దుర్మరణం
హయత్‌నగర్‌లోని జిల్లా పరిషత్‌ హై స్కూలులో సోమవారం సాయంత్రం పాఠశాల గేటు విరిగి విద్యార్థి మృతి చెందాడు.
రంగారెడ్డి జిల్లా హయత్‌నగర్‌ ప్రభుత్వ పాఠశాలలో ఐరన్ గేటు విరిగి ఓ విద్యార్థిపై పడటంతో మృతి చెందాడు. జిల్లా పరిషత్‌ హై స్కూలులో ఇవాళ సాయంత్రం స్కూల్ గేటు విరిగి ఒకటో తరగతి విద్యార్థిపై పడింది. ఈ ప్రమాదంలో బాలుడు తీవ్రంగా గాయపడ్డాడు. దాదాపు 4 గంటల సమయంలో పాఠశాల ప్రధాన గేటుతో బాలుడు ఆడుకుంటున్నాడు. అదే సమయంలో మరికొందరు చిన్నారులు గేటు ఎక్కి అటూ ఇటూ ఊపారు.
ఈ క్రమంలో గేటు వెల్డింగ్‌ జాయింట్లు ఊడిపోయి మీద పడడంతో బాలుడి తలకు తీవ్ర గాయాలయ్యాయి. సమాచారం అందుకున్న పోలీసులు.. ఘటనా స్థలానికి చేరుకొని చిన్నారిని వనస్థలిపురం ఏరియా ఆస్పత్రికి తరలించారు. పరీక్షించిన అక్కడి వైద్యులు.. అప్పటికే మృతిచెందినట్లు తెలిపారు. బాలుడు స్థానిక ముదిరాజ్‌ కాలనీకి చెందిన విద్యార్థిగా పోలీసులు గుర్తించారు. సమాచారం అందుకున్న పోలీసులు ఘటన స్థలానికి చేరుకొని కేసు నమోదు చేసుకోని దర్యాప్తు చేస్తున్నారు
