పానీపూరీలు అమ్మిన చేతులతోనే టెస్టు అరంగేట్రం శతకం!

భారత యువఓపెనర్ యశస్వి జైశ్వాల్ టెస్టు అరంగేట్రం మ్యాచ్ లోనే అజేయ సెంచరీతో హేమాహేమీల సరసన నిలిచాడు. కెప్టెన్ రోహిత్ శర్మతో జంటగా 229 పరుగుల రికార్డు భాగస్వామ్యం నమోదు చేశాడు....

వెస్టిండీస్ తో రెండుమ్యాచ్ ల టెస్ట్ లీగ్ తొలిపోరులో భారత ఓపెనర్లు సెంచరీలతో చెలరేగిపోయారు. డోమనికాలోని విండ్సర్ పార్క్ వేదికగా జరుగుతున్న ఈ టెస్టు మ్యాచ్ రెండోరోజు ఆటలో సైతం భారత్ ఆధిపత్యమే కొనసాగింది.

డోమనికా టెస్టుతో అరంగేట్రం చేసిన 21 సంవత్సరాల భారత యువఓపెనర్ యశస్వి జైశ్వాల్ రెండోరోజు మొత్తం బ్యాటింగ్ కొనసాగించడ ద్వారా 143 పరుగుల అజేయ స్కోరు సాధించాడు.

భారత మూడో ఓపెనర్ యశస్వి....

భారత టెస్టు చరిత్రలో అరంగేట్రం టెస్టులోనే శతకం బాదిన మూడో భారత ఓపెనర్ గా యశస్వి రికార్డుల్లో చేరాడు. బ్యాటింగ్ కు..ప్రధానంగా స్ట్ర్రోక్ ప్లేయర్లకు ఏమాత్రం అనువుకాని డోమనికా పిచ్ పైన భారత ఓపెనింగ్ జోడీ రోహిత్ శర్మ- యశస్వి జైశ్వాల్ మొదటి వికెట్ కు 229 పరుగుల భాగస్వామ్యంతో సరికొత్త రికార్డు నెలకొల్పారు.

1982 ఇంగ్లండ్ పర్యటనలో భారత్ కు ప్రాతినిథ్యం వహించిన నాటి ముంబై జోడీ సునీల్ గవాస్కర్- సురు నాయక్ ల తర్వాత..41 సంవత్సరాలకు మరోసారి రోహిత్- యశస్విల రూపంలో మరో ముంబై ఓపెనింగ్ జోడీ భారత ఇన్నింగ్స్ ప్రారంభించడం విశేషం.

2001 సిరీస్ లో వెస్టిండీస్ ప్రత్యర్థిగా సంజయ్ బంగర్- వీరేంద్ర సెహ్వాగ్ జోడీ మొదటి వికెట్ కు సాధించిన 201 పరుగుల రికార్డు భాగస్వామ్యాన్ని 22 సంవత్సరాల విరామం తర్వాత రోహిత్- యశస్వి జోడీ 229 పరుగుల భాగస్వామ్యంతో అధిగమించగలిగారు.

2013 సిరీస్ లో ఆస్ట్ర్రేలియాపై శిఖర్ ధావన్, 2018 సిరీస్ లో వెస్టిండీస్ ప్రత్యర్థిగా పృథ్వీ షా తమ అరంగేట్రం టెస్టుల్లోనే శతకాలు సాధించగా..ప్రస్తుత 2023 సిరీస్ తొలిటెస్టులోనే యశస్వి జైశ్వాల్ సైతం అజేయశతకం బాదడం ద్వారా ఈ ఘనత సాధించిన భారత మూడో ఓపెనర్ గా రికార్డుల్లో చేరాడు.

21 ఏళ్ళ 197 రోజుల వయసులో...

అత్యంత పిన్నవయసులో..టెస్టు అరంగేట్రం మ్యాచ్ లోనే సెంచరీ సాధించిన నాలుగో అత్యంత పిన్నవయస్కుడైన బ్యాటర్ గా యశస్వి జైశ్వాల్ రికార్డు నెలకొల్పాడు.డోమనికాలోని విండ్సర్ పార్క్ స్లోపిచ్ పైన యశస్వి ఎనలేని ఓర్పుతో ఆడి కీలక శతకంతో అజేయంగా నిలిచాడు.

2013లో ఆస్ట్ర్రేలియాపైన శిఖర్ ధావన్ 187 పరుగులు, 2018లో వెస్టిండీస్ పై పృథ్వీ షా 134 పరుగులు సాధించారు. అయితే..యశస్వి జైశ్వాల్ మాత్రం 350 బంతులు ఎదుర్కొని 14 బౌండ్రీలతో 143 పరుగుల స్కోరుతో నాటౌట్ గా నిలిచాడు.

భారత 17వ క్రికెటర్ యశస్వి...

టెస్టు అరంగేట్రం మ్యాచ్ లోనే సెంచరీ బాదిన భారత 17వ క్రికెటర్ గా యశస్వి జైశ్వాల్ రికార్డుల్లో చేరాడు. యశస్వి కంటే ముందుగా అరంగేట్రం శతకాలు నమోదు చేసిన భారత ప్రముఖ బ్యాటర్లలో లాలా అమర్‌నాథ్‌, గుండప్ప విశ్వనాథ్‌, మహమ్మద్‌ అజారుద్దీన్‌, సౌరవ్‌ గంగూలీ, వీరేంద్ర సెహ్వాగ్‌, సురేశ్‌ రైనా, శిఖర్‌ ధవన్‌, రోహిత్‌ శర్మ, పృథ్వీ షా, శ్రేయస్‌ అయ్యర్‌ ఉన్నారు. 2021 సిరీస్ లో కాన్పూర్ వేదికగా న్యూజిలాండ్ పై శ్రేయస్ అయ్యర్ అరంగేట్రం శతకం సాధించిన తర్వాత..అదే ఘనతను యశస్వి జైశ్వాల్ మాత్రమే దక్కించుకోగలిగాడు.

గత 13 ఏళ్లలో భారత తొలి బ్యాటర్...

విదేశీగడ్డపై టెస్టు అరంగేట్రం మ్యాచ్ లోనే శతకం బాదిన భారత 7వ బ్యాటర్ గా, గత 13 సంవత్సరాలలో భారత తొలి క్రికెటర్ గా యశస్వి నిలిచాడు. 2010 సిరీస్ లో శ్రీలంక గడ్డపై సురేశ్ రైనా అరంగేట్రం టెస్టు శతకం నమోదు చేసిన తర్వాత..కరీబియన్ గడ్డపై యశస్వి అదే రికార్డును అందుకోగలిగాడు.

కెప్టెన్ రోహిత్ శర్మతో కలసి మొదటి వికెట్ కు 229 పరుగులు, మాజీ కెప్టెన్ విరాట్ కొహ్లీతో కలసి రెండో వికెట్ కు 72 పరుగుల అజేయ భాగస్వామ్యం నమోదు చేయడంలో యశస్వి ప్రధానపాత్ర వహించాడు.

క్రికెట్ పిచ్చితో ముంబై ఫుట్ పాత్ ల పైన పడుకొని, పానీపూరీలు అమ్మటం ద్వారా కడుపు నింపుకొన్న యశస్వీ జైశ్వాల్..21 సంవత్సరాల వయసుకే అంతర్జాతీయ క్రికెటర్ గా ఎదగటం, టెస్టు క్రికెట్ అరంగేట్రంలోనే భారీశతకం బాదటం భారత క్రికెట్ విజయగాధల్లో ఒకటిగా మిగిలిపోతుంది.