అండర్-19 టీ20 ప్రపంచ కప్‌లో వెస్టిండీస్‌పై భారత్ ఘన విజయం

ఉమెన్ అండర్-19 టీ20 ప్రపంచ కప్‌లో తొలి మ్యాచ్‌లో భారత అమ్మాయిలు అదరగొట్టారు. కౌలాలంపూర్ లో ఇవాళ వెస్టిండీస్ తో జరిగిన పోరులో టీమిండియా అమ్మాయిలు 9 వికెట్ల తేడాతో ఘనవిజయం సాధించారు. ఈ మ్యాచ్ లో టాస్ గెలిచిన భారత్ బౌలింగ్ ఎంచుకుంది. దాంతో, తొలుత బ్యాటింగ్ చేసిన వెస్టిండీస్ 13.2 ఓవర్లలో 44 పరుగులకే కుప్పకూలింది. టీమిండియా బౌలర్లలో పరుణికా సిసోడియా 3, వీజే జోషిత 2, ఆయుషి శుక్లా 2 వికెట్ల తీశారు.

అనంతరం, 45 పరుగుల స్వల్ప లక్ష్యాన్ని టీమిండియా అమ్మాయిలు అలవోకగా ఛేదించారు. కేవలం 4.2 ఓవర్లలోనే 1 వికెట్ నష్టానికి 47 రన్స్ చేసి విజయం అందుకున్నారు. ఓపెనర్ గా దిగిన తెలుగమ్మాయి గొంగడి త్రిష 4 పరుగులకే అవుటైనా... మరో ఓపెనర్ కమలిని 16, సనికా చల్కే 18 పరుగులు చేయడంతో భారత్ విజయం సాధించింది.