ఎన్నికలవేళ రిజర్వేషన్లతో పొలిటికల్ గేమ్

కమీషన్ రాజ్ అనే అపవాదు మూటగట్టుకున్న కర్నాటక బీజేపీ ప్రభుత్వం, అసెంబ్లీ ఎన్నికల వేళ రిజర్వేషన్ల పొలిటికల్ గేమ్ మొదలు పెట్టింది. మైనార్టీల ఓట్లు తమకు పడవనే అనుమానంతో వారి రిజర్వేషన్లు తొలగించి ఒక్కలిగలు, లింగాయత్ లకు సమానంగా పంచింది. ఈ వివాదం ఇప్పుడు కర్నాటకను ఊపేస్తోంది. తాము అధికారంలోకి వస్తే ఆ 4 శాతం రిజర్వేషన్లు ముస్లింలకు కేటాయిస్తామని చెబుతున్న కాంగ్రెస్.. ఒక్కలిగలు, లింగాయత్ ల ఓట్లు తమకు పడవేమోననే అనుమానంతో భయపడుతోంది.

ముస్లింలకు OBC కోటాలో గతంలో కాంగ్రెస్ ప్రభుత్వం 4 శాతం రిజర్వేషన్లు కల్పించింది. వాటిని ఏకపక్షంగా తొలగించింది బీజేపీ ప్రభుత్వం. EWS కోటాలో ముస్లింలకు 10శాతం రిజర్వేషన్ ఉందనే సాకుతో OBC జాబితాలోని 2B కేటగిరీ నుంచి ముస్లింలను తొలగించింది. ఆ 4 శాతం రిజర్వేషన్లను లింగాయత్ లకు 2 శాతం, ఒక్కలిగలకు 2 శాతం కేటాయించింది. దీంతో అక్కడ మెజార్టీ ఓటర్లుగా ఉన్న లింగాయత్ లు, ఒక్కలిగలు బీజేపీకి మరింత దగ్గరవుతున్నారని తెలుస్తోంది. కాంగ్రెస్ ఆ రిజర్వేషన్లు తీసేస్తామని చెబుతున్నా కూడా ఆ రెండు వర్గాల ఓట్లు తమకు దూరమవుతాయని భయపడుతోంది.

ముస్లింలను OBC జాబితా నుంచి ఏ ప్రాతిపదికన తొలిగించారంటూ కాంగ్రెస్‌ మండిపడింది. ఇది మతాల మధ్య మంటలు రాజేసే యత్నమంటూ దుయ్యబట్టింది. ముస్లింల 4 శాతాన్ని తమకు పంచడంపై లింగాయత్‌ లు, ఒక్కలిగలు కూడా సంతోషంగా లేరని చెప్పుకొచ్చింది. మరోవైపు ఎస్సీ రిజర్వేషన్లను 4 భాగాలు చేసింది. దీంతో కర్నాటకలో ఎస్సీ రిజర్వేషన్లలో తమకు అన్యాం జరిగిందంటూ బంజారాలు, ఆదివాసీలు ఆందోళనకు దిగారు.

మొత్తమ్మీద ఎన్నికల వేళ కర్నాటకలో రిజర్వేషన్ల రాజకీయం రాజుకుంది. ఈ మంటల్ని ఎగదోసి పబ్బం గడుపుకోవాలని చూస్తోంది బీజేపీ. అవినీతి సర్కారు అనే ముద్ర నుంచి దూరం జరగాలనే ప్రయత్నాల్లో ఉంది. అది ఎంతవరకు సాధ్యపడుతుందో చూడాలి.