పెళ్లింట విషాదం.. రోడ్డు ప్రమాదంలో 11 మంది దుర్మరణం

ఒడిశా రాష్ట్రం గంజాం జిల్లాలో ఘోర రోడ్డు ప్రమాదం జరిగింది. పెళ్లి వేడుకకు హాజ‌రై బస్సులో తిరిగి వస్తుండగా జరిగిన ప్రమాదంలో 11 మంది మృతిచెందారు. మరో 8 మంది గాయపడ్డారు. బ్రహ్మపురకు చెందిన ఓ యువతికి ఆదివారం వివాహం జరిగింది. పెళ్లి తర్వాత నవ వధువును ఆమె కుటుంబ సభ్యులు అత్తవారింటిట్లో సాగ‌నంపేందుకు వెళ్లారు. అక్కడ వరుడు ఇంట్లో రాత్రి విందు భోజనాలు ఏర్పాటు చేశారు. ఈ కార్యక్రమం అనంతరం వధువు కుటుంబ సభ్యులు ఒక ప్రైవేటు బస్సులో తిరిగి సొంతూరికి బయలుదేరారు.

సోమవారం తెల్లవారుజామున ఆ బస్సు బ్రహ్మపుర, తప్తపాణి రోడ్డులో వెళ్తూ దిగపహండి ప్రాంతం వద్ద ఎదురుగా వచ్చిన ఓపీఎస్ ఆర్టీసీ బస్సును ఢీకొంది. ప్రమాదంలో రెండు బస్సులు ధ్వంసమయ్యాయి. సంఘటనా స్థలంలోనే 11 మంది దుర్మరణం చెందారు. 8 మంది గాయపడ్డారు.

సమాచారం అందుకున్న పోలీసులు ఘటనా స్థలికి చేరుకొని సహాయ చర్యలు చేపట్టారు. క్షతగాత్రులను బ్రహ్మపురలోని ఎంకేసీజీ ఆస్పత్రికి తరలించారు. ప్రైవేట్ బస్సు ఆర్టీసీ బస్సును ఢీకొన్న ఘటనలో ఎక్కువమంది ప్రైవేట్ బస్సులోని వారే మృతి చెందారు.

ఈ ప్రమాదంలో ఒకే కుటుంబానికి చెందిన ఏడుగురు చనిపోయారు. మృతుల్లో వధువు అక్కాచెల్లెళ్లు కూడా ఉన్నారు. పెళ్లి తంతు ముగించుకొని సంబరాల్లో ఉన్న ఆ కుటుంబంలో రోడ్డు ప్రమాదం తీవ్ర విషాదాన్ని మిగిల్చింది. కాగా, ప్రమాదంపై రాష్ట్ర ముఖ్యమంత్రి నవీన్ పట్నాయక్ తీవ్ర దిగ్భ్రాంతి వ్యక్తం చేశారు. మృతుల కుటుంబాలకు రూ. 3 లక్షల చొప్పున‌ పరిహారం అందిస్తామని ప్రకటించారు. గాయపడ్డ వారికి మెరుగైన వైద్యం అందించాలని అధికారులను ఆదేశించారు.