ఢిల్లీలోని ఎయిమ్స్‌ హాస్పిటల్‌కు వెళ్లిన ప్రధాని
హాస్పిటల్‌లో చికిత్స పొందుతున్న ఉప రాష్ట్రపతి జగదీప్‌ ధన్‌ఖడ్‌ ఆరోగ్య పరిస్థితి గురించి డాక్టర్లను అడిగి తెలుసుకున్న మోడీ
ప్రధాని నరేంద్ర మోడీ ఢిల్లీలోని ఎయిమ్స్‌ హాస్పటల్‌కు వెళ్లారు. హాస్పిటల్‌లో చికిత్స పొందుతున్న ఉప రాష్ట్రపతి జగదీప్‌ ధన్‌ఖడ్‌ ఆరోగ్య పరిస్థితి గురించి డాక్టర్లను అడిగి తెలుసుకున్నారు. ఈ విషయాన్ని ప్రధాని స్వయంగా 'ఎక్స్‌'లో పోస్టు చేశారు. జగదీప్‌ ధన్‌ఖడ్‌ ఆరోగ్యంగా ఉండాలని, త్వరగా కోలుకోవాలని ఆకాంక్షించారు.
ఆదివారం తెల్లవారు జామున 2 గంటల సమయంలో ఛాతిలో నొప్పి రావడంతో ఉపరాష్ట్రపతి జగదీప్‌ ధన్‌ఖడ్‌ను ఆస్పత్రిలో చేర్పించిన విషయం విదితమే. ప్రస్తుతం ఆయనను ఎయిమ్స్‌లోని క్రిటికల్‌ కేర్‌ యూనిట్‌ (సీసీయూ)లో ఉంచి కార్డియాలజీ విభాగాధిపతి డాక్టర్‌ రాజీవ్‌ నారంగ్‌ ఆధ్వర్యంలో చికిత్స అందిస్తున్నారు. ఈ సమాచారం తెలుసుకున్న ప్రధాని మోడీ హాస్పిటల్‌కు వెళ్లి ఆరోగ్యంపై ఆరా తీశారు. మరోవైపు ఉదయాన్నే కేంద్ర ఆరోగ్య శాఖ మంత్రి జేపీ నడ్డా హాస్పిటల్‌కు వెళ్లి ఉప రాష్ట్రపతి ఆరోగ్య పరిస్థితి గురించి తెలుసుకున్నారు.
