కాన్పూర్ లో పంజాబ్ తరహా ఘటన.. హాస్టల్ ఉద్యోగి మొబైల్ లో విద్యార్థినుల అసభ్య వీడియోలు

కొద్దిరోజుల కిందట పంజాబ్ లోని చండీగఢ్ యూనివర్సిటీలో ఒక విద్యార్థిని తన సహ విద్యార్థినులు స్నానం చేస్తుండగా వీడియోలు తీసి వాటిని తన బాయ్ ఫ్రెండ్ కు పంపించిన సంగతి తెలిసిందే. ఈ వీడియోలు కాస్త సోషల్ మీడియాలో అప్లోడ్ కావడంతో ఈ ఘటనపై విద్యార్థినులు యూనివర్సిటీ ఎదుట ఆందోళనలు వ్యక్తం చేశారు. ఈ సంఘటన దేశవ్యాప్తంగా తీవ్ర సంచలనం సృష్టించింది. ఈ ఘటన మరువకముందే ఇదే తరహా సంఘటన ఉత్తర్ ప్రదేశ్ రాష్ట్రం కాన్పూర్ లో జరిగింది.

తాము స్నానం చేస్తుండగా హాస్టల్ ఉద్యోగి రహస్యంగా వీడియోలు తీశాడని ఆరోపిస్తూ విద్యార్థినులు నిరసన వ్యక్తం చేశారు. ఈ ఘటనపై పోలీసులకు ఫిర్యాదు చేసిన వారు పట్టించుకోకపోవడంతో ఆందోళన బాటపట్టారు. కాన్పూర్ లోని సాయి నివాస్ హాస్టల్ లో పెద్ద సంఖ్యలో విద్యార్థినులు బస చేస్తున్నారు. ఆ హాస్టల్ లో పని చేసే ఒక ఉద్యోగి మొబైల్ ఫోన్లో అసభ్యకర వీడియోలు ఉన్నట్లు బాలికలు చూశారు.

అవి తాము స్నానం చేస్తుండగా రహస్యంగా తీసిన వీడియోలుగా వారు గుర్తించారు. ఈ విషయమై హాస్టల్ విద్యార్థినులు స్థానిక పోలీస్ స్టేషన్లో ఫిర్యాదు చేశారు. వారి నుంచి ఎటువంటి స్పందన రాకపోవడంతో స్టేషన్ ఎదుట నిరసన వ్యక్తం చేశారు. దీంతో దిగివచ్చిన పోలీసులు ఈ ఘటనపై కేసు నమోదు చేసి హాస్టల్ ఉద్యోగిని అరెస్టు చేశారు. అతడి వద్ద ఉన్న మొబైల్ ఫోన్ ను స్వాధీనం చేసుకొని ఫోరెనిక్స్ విభాగానికి తరలించినట్లు పోలీసులు తెలిపారు.