కేంద్ర మాజీ మంత్రి, జేడీయూ మాజీ అధ్యక్షుడు శ‌ర‌ద్ యాద‌వ్ క‌న్నుమూత‌

జేడీయూ మాజీ అధ్యక్షుడు, సీనియర్ రాజకీయ నాయకుడు శరద్ యాదవ్ ఇక లేరు. ఈ విషయాన్ని శరద్ యాదవ్ కుమార్తె శుభాషిణి యాదవ్ ట్వీట్ చేశారు . అతని వయస్సు 75 సంవత్సరాలు. 'పాపా ఇక లేరు' అని శుభాషిణి తన ట్వీట్‌లో రాశారు. గురుగ్రామ్‌లోని ఫోర్టిస్ ఆసుపత్రిలో చికిత్స పొందుతూ శరద్ యాదవ్ మృతి చెందారు. గత కొద్దిరోజులుగా ఆయన అనారోగ్యంతో బాధపడుతున్నారు.

విద్యార్థి రాజకీయాల నుంచి రాజకీయ ప్రస్థానం ప్రారంభం

శరద్ యాదవ్ స్వాతంత్య్రానికి ఒక నెల ముందు జులై 1, 1947న జన్మించారు. బీహార్ రాజకీయాల నుండి జాతీయ రాజకీయాల వరకు గుర్తింపు పొందారు. మధ్యప్రదేశ్‌లోని హోషంగాబాద్‌లోని బందాయ్ గ్రామంలో రైతు కుటుంబంలో జన్మించిన ఆయన విద్యార్థి రాజకీయాల నుంచి పార్లమెంటరీ రాజకీయాల్లోకి వచ్చిన నాయకులలో ఒకరు. శరద్ యాదవ్ మొదట మధ్యప్రదేశ్, ఆ తర్వాత ఉత్తరప్రదేశ్, ఆ తర్వాత బీహార్‌లో తన రాజకీయ జెండాను ఎగురవేశారు. శరద్ యాదవ్ జేడీయూ జాతీయ అధ్యక్షుడిగా కూడా ఉన్నారు. అతను దేశంలోని ప్రముఖ సోషలిస్టు నాయకులలో ఒకరు. బీహార్ ప్రస్తుత సీఎం నితీష్ కుమార్‌తో విభేదాలు రావడంతో ఆయన పార్టీని వీడారు. ఆయన బీహార్‌లోని మాధేపురా స్థానం నుంచి చాలాసార్లు ఎంపీగా గెలుపొందారు. శరద్ యాదవ్ మృతి పట్ల పలువురు రాజకీయ నాయకులు సంతాపం తెలిపారు.

బీహార్ డిప్యూటీ సీఎం తేజస్వీ యాదవ్ ఓ ట్వీట్ ద్వారా నివాళులర్పించారు, 'ఆర్జేడీ సీనియర్ నాయకుడు, గొప్ప సోషలిస్ట్ నాయకుడు, నా సంరక్షకుడు శరద్ యాదవ్ జీ అకాల మరణ వార్తతో నేను బాధపడ్డాను. నేను ఏమీ చెప్పలేకపోతున్నాను. అమ్మ, సోదరుడు శంతనుతో మాట్లాడాను. ఈ దుఃఖ సమయంలో ఆర్జేడీ కుటుంబం మొత్తం ఆయన కుటుంబంతో కలిసి ఉంది.'' అన్నారు