హిందువులు దూరమవుతుండటంతో బీజేపీ మైనార్టీలను బుజ్జగించే ప్రణాళికలు రచిస్తోందా ?

భారతీయ జనతా పార్టీ, దాని విజయం కోసం ఇప్పటి వరకు ప్రధానంగా హిందూ ఓట్ల పోలరైజేషన్‌పై ఆధారపడింది. అయితే 2024 సార్వత్రిక ఎన్నికలకు ఇంకా ఏడాది సమయం మాత్రమే ఉన్న ఈ సమయంలో ఆ పార్టీ క్రిస్టియన్, ముస్లింల గురించి ఎక్కువగా మాట్లాడటం, వారిని బుజ్జగించే చర్యలు చేపట్టడం ప్రారంభించింది. వరుసగా మూడోసారి అధికారాన్ని కైవసం చేసుకునేందుకు బుజ్జగింపు రాజకీయాల వైపు వెళుతోందనడానికి స్పష్టమైన సూచన కనపడుతోంది. ప్రతిపక్ష పార్టీలు మైనార్టీల బుజ్జగింపు రాజకీయాలు చేస్తున్నాయని తరచుగా ఆరోపిస్తున్న బీజేపీ నాయకత్వం పెద్ద ఎత్తున అదే పనికి సిద్ధపడడం విడ్డూరం.

బీజేపీకి గత రెండు సార్వత్రిక‌ ఎన్నికల్లో ఓట్లు వేసిన అనేక వర్గాలు ఆ పార్టీకి దూరమవడంతో ఆ పార్టీకి మరిన్ని ఓటు బ్యాంకులు సృష్టించుకునే అవసరం ఏర్పడింది. అందులో భాగంగానే కొంత కాలంగా, అటు ఆరెస్సెస్, ఇటు మోడీ ముస్లింలను బుజ్జగించే ధోరణిలో మాట్లాడుతున్నారు.

ఆసక్తికరమైన విషయమేమిటంటే, మైనారిటీల సమస్యలను బిజెపి ఎత్తుకున్నప్పుడు, తృణమూల్ కాంగ్రెస్, సమాజ్‌వాదీ పార్టీ, జనతాదళ్ (యు) భారత రాష్ట్ర సమితి, ఆమ్ ఆద్మీ పార్టీ వంటి ప్రాంతీయ పార్టీలు హనుమాన్ జయంతి, ఇతర ప్రధాన హిందూ పండుగలను జరుపుకోవడం ప్రారంభించాయి. ‘జై శ్రీరామ్‌’ని రాజకీయ నినాదంగా భావిస్తున్న‌ మమతా బెనర్జీ ఇటీవలే హరే కృష్ణ ఆలయాన్ని సందర్శించారు.

బిజెపి 2014 నుండి 'సబ్కా సాథ్ సబ్‌కా వికాస్' ఎజెండాపై పని చేస్తోంది, అయితే ముస్లింల మద్దతు పొందడం ఇప్పుడు దానికి అంతుచిక్కని లక్ష్యంగా మారింది. అందుకే ముస్లింల కోసం బీజేపీ మెల్లెగా గొంతు విప్పడం మొదలుపెట్టింది. రాబోయే 2024 లో వారి మద్దతు కోరుతోంది. ఈ ఏడాది ప్రారంభంలో జరిగిన పార్టీ జాతీయ కార్యవర్గ సమావేశంలో, మైనారిటీ వర్గాల వారు తమకు ఓటు వేయకపోయినా, పార్టీ తమ విధానాలను, దృక్పథాన్ని వారికి వివరించాలని ప్రధాని నరేంద్ర మోడీ ప్రత్యేకంగా నాయకులకు చెప్పారు.

ఈ ఏడాది అసెంబ్లీ ఎన్నికలు జరగనున్న తెలంగాణలో కూడా, అధికారంలో ఉన్న బీఆర్‌ఎస్‌కు సమాజంలోని అన్ని వర్గాలు, ప్రత్యేకించి దళితులు, గిరిజనులు, దళితులు, ఆదివాసీల మధ్య బలమైన పట్టు ఉన్నందున, కాషాయ పార్టీ దానిని ఛేదించడం కష్టమని గ్రహించింది. అందువల్ల రాష్ట్రంలోని అట్టడుగు స్థాయిలో ఉన్న మైనారిటీ ఓటర్లతో, ముఖ్యంగా ముస్లింలతో అనుసంధానం చేసేందుకు మైనారిటీ-కేంద్రీకృత కార్యక్రమాన్ని ప్రారంభించాలని యోచిస్తోంది. అయితే ముఖ్యమంత్రి కేసీఆర్ నేతృత్వంలోని బీఆర్‌ఎస్‌ ప్రభుత్వం బలహీన వర్గాలు, మైనార్టీల కోసం అమలు చేస్తున్న సంక్షేమ పథకాలు బీజేపీ ప్రయత్నాలకు అడ్డంకిగా మారాయి. కాషాయ పార్టీ అవినీతి సమస్యలను లేవనెత్తుతున్నప్పటికీ, బీఆర్‌ఎస్ ప్రభుత్వం చేస్తున్న అభివృద్ధిపై ప్రజలు ఎక్కువ ఆసక్తి చూపుతుండటంతో బీజేపీ నిస్సహాయంగా ఉన్నది.

హైదరాబాద్‌లో ఏఐఎంఐఎం బలంగా ఉండటం, రాష్ట్రంలోని ఇతర ప్రాంతాల్లో అధికార బీఆర్‌ఎస్‌కు మద్దతివ్వడం బీజేపీ పనిని కష్టతరం చేస్తోంది. పైగా, మైనారిటీ కమ్యూనిటీలలో, ముఖ్యంగా ముస్లింలలో అనుచరులు, మద్దతుదారులు గణనీయమైన సంఖ్యలో ఉన్న కాంగ్రెస్, కాషాయ పార్టీ ఎదుగుదలకు చెక్ పెట్టే అవకాశం ఉంది.

తెలంగాణలో 2018 అసెంబ్లీ ఎన్నికల్లో కేవలం ఒక్క సీటు గెలుచుకున్న బీజేపీ, తెలంగాణ ప్రజల విశ్వాసాన్ని పొందేందుకు పోరాడుతూ, హిందుత్వ కార్డును ప్లే చేసేందుకు ప్రయత్నిస్తోంది, కానీ పార్టీ జాతీయ నాయకత్వం తన ఎజెండా నుండి మారిపోయి మైనారిటీ కేంద్రంగా వ్యూహాలను సిద్ధం చేస్తోంది. దాంతో పార్టీ రాష్ట్ర నాయకత్వానికి ఇక్కడ జాతీయ నాయకత్వ ఎజెండాను అమలు చేయడం కష్టంగా మారింది.

మరో వైపు జ్ఞానవాపి కేసులో ఆర్‌ఎస్‌ఎస్ చీఫ్ మోహన్ భగవత్ విధానం, ‘ప్రతి మసీదులో శివలింగం ఎందుకు వెతకాలి’ అని ఆయన ప్రశ్నించడం కూడా వారు ముస్లింలను బుజ్జగించడంలో భాగమే అనే అనుమానాలు తలెత్తుతున్నాయి.

కాశ్మీర్‌లో UAE తన వ్యాపార శిఖరాగ్ర సమావేశాన్ని నిర్వహించడం కూడా మైనారిటీలను ప్రలోభపెట్టడానికి బిజెపి వేసిన ప్రణాళికలో భాగమనే అనుకుంటున్నారు.