Mark Antony - తెలుగులో తొలిసారి పాట పాడిన విశాల్
Vihal Mark Antony - మార్క్ ఆంటోనీ సినిమా కోసం తొలిసారి తెలుగులో పాట పాడాడు విశాల్. తాజాగా ప్రోమో రిలీజ్ చేశారు.
వరుస సినిమాలతో బిజీగా ఉన్న హీరో విశాల్.. ఇప్పుడు ‘మార్క్ ఆంటోనీ’ అనే పాన్ ఇండియా సినిమాతో ప్రేక్షకుల ముందుకు రాబోతున్నాడు. హై వోల్టేజ్ యాక్షన్ థ్రిల్లర్‌ గా ఈ మూవీ రూపొందుతోంది. ఈ సినిమాలో విశాల్ కి జోడీగా రీతూ వర్మ నటిస్తోంది. ఎస్.జె.సూర్య, సునీల్, సెల్వ రాఘవన్ ముఖ్య పాత్రలు పోషిస్తున్నారు. అధిక్ రవిచంద్రన్ దర్శకత్వం వహిస్తుండగా.. ఎస్ వినోద్ కుమార్ నిర్మాణ బాధ్యతలు చేపట్టారు.
ప్రస్తుతం పోస్ట్ ప్రొడక్షన్ స్టేజ్ లో ఉన్న ఈ చిత్రాన్ని వినాయక చవితికి రిలీజ్ చేయాలనుకుంటున్నారు. ఈ మేరకు సెప్టెంబర్ 15న తేదీని ఫిక్స్ చేశారు. ఇందులో భాగంగా ప్రమోషన్స్ వేగవంతం చేసింది టీమ్.
తాజాగా ఈ సినిమా నుంచి విశాల్ ఆలపించిన అదరద సాంగ్ ప్రోమో రిలీజ్ చేశారు. అదరద గుండె అదరద మావా.. బెదరగ బెంగ మొదలవదా అంటూ సాగిపోతున్న ఈ పాటను విశాల్ ఫుల్ ఎనర్జీతో పాడాడు. దీంతో ఈ సాంగ్ ప్రోమో క్షణాల్లో వైరల్ గా మారింది.
విశాల్ తెలుగులో పాడిన తొలి పాట ఇది. ఇదే పాటను తమిళ్ లో శింబు తండ్రి రాజేందర్ ఆలపించారు. ఇకపోతే ఇటీవల రిలీజైన ఈ మూవీ టీజర్ కు మంచి స్పందన లభించింది. విశాల్ ఇందులో సరికొత్తగా కనిపించాడు. గుబురు గడ్డంతో ఉన్నాడు. ఈ చిత్రానికి జి.వి. ప్రకాష్ సంగీతం అందిస్తున్నాడు.
మార్క్ ఆంటోనీ టైమ్ ట్రావెల్ థీమ్ చుట్టూ తిరిగే కథ. భారీ యాక్షన్ సన్నివేశాలు, సైన్స్ ఫిక్షన్ అంశాలతో, అక్కడక్కడ ఎస్.జె.సూర్య కామెడీ టైమింగ్ తో ఈ చిత్రం ఆద్యంతం అందరినీ అలరిస్తుందని చెబుతున్నాడు విశాల్.
