సూపర్ హిట్ బ్యానర్ నుంచి మరో సినిమా
మళ్లీ రావా, ఏజెంట్ సాయిశ్రీనివాస్ ఆత్రేయ లాంటి హిట్ సినిమాలు తీసిన నిర్మాత, తన కొత్త సినిమాతో రెడీ అయ్యాడు. పేరు మసూద.
'మళ్లీ రావా', 'ఏజెంట్ సాయిశ్రీ‌నివాస ఆత్రేయ' చిత్రాలతో సక్సెస్‌ఫుల్ బ్యానర్‌గా పేరు తెచ్చుకున్న స్వధ‌ర్మ్ ఎంట‌ర్‌టైన్‌మెంట్‌లో రాబోతోన్న మూడో చిత్రం 'మసూద'. కంటెంట్ సినిమాలకు కేరాఫ్ అడ్రస్‌గా మారిన ఈ బ్యానర్‌లో తెరకెక్కుతోన్న ఈ చిత్రంపై ఇప్పటికే భారీ అంచనాలు నెలకొన్నాయి.
ఇప్పటికే విడుదలైన టైటిల్ లుక్ పోస్టర్ ట్రైమండస్ రెస్పాన్స్‌ని సొంతం చేసుకోగా.. ఇప్పుడు చిత్ర టీజర్‌ను విడుదల చేసేందుకు మేకర్స్ రెడీ అయ్యారు. ఆగస్ట్ 2న ఈ చిత్ర టీజర్ విడుదల కాబోతోంది. తొలి రెండు సినిమాలతో గౌతమ్ తిన్ననూరి, స్వరూప్‌లను టాలీవుడ్ కు పరిచయం చేసిన నిర్మాత రాహుల్ యాదవ్ నక్కా.. హర్రర్ డ్రామా జోనర్‌లో రూపుదిద్దుకుంటోన్న ఈ చిత్రంతో సాయికిరణ్ అనే మరో డైరెక్టర్‌ని ఇండస్ట్రీకి పరిచయం చేస్తున్నాడు.
హీరోగా 'జార్జిరెడ్డి' ఫేమ్ తిరువీర్ (ల‌ల్లన్ సింగ్ పాత్రధారి) న‌టిస్తుండగా.. 'గంగోత్రి' చిత్రంలో బాల‌న‌టిగా అల‌రించిన కావ్య క‌ల్యాణ్‌రామ్ ఈ చిత్రంతో హీరోయిన్‌గా ప‌రిచ‌య‌మ‌వుతోంది. సీనియర్ నటి సంగీత కీలక పాత్రలో కనిపించనుంది. ప్రశాంత్ విహారి సంగీతం అందిస్తున్న ఈ సినిమాకు సంబంధించి మరిన్ని వివరాల్ని, టీజర్ రిలీజ్ రోజు వెల్లడించబోతున్నారు.
