తన ఆరోగ్య పరిస్థితిని బయటపెట్టిన సమంత

సమంత ఉన్నట్టుండి సడెన్ గా విదేశాలకు వెళ్లిపోయిందన్నారు కొందరు. ఆమె తన ముఖానికి ప్లాస్టిక్ సర్జరీ చేయించుకుందంటూ పుకార్లు పుట్టించారు. ఆమె ఓ రకమైన చర్మవ్యాధితో బాధపడుతోందని మరికొందరు రాసుకొచ్చారు. ఇలా సమంత ఆరోగ్య పరిస్థితిపై గడిచిన కొన్నాళ్లుగా పుకార్లు వస్తూనే ఉన్నాయి. ఎట్టకేలకు తన హెల్త్ కండిషన్ పై సమంత స్పందించింది.

తను మయోస్టైటిస్ అనే సమస్యతో బాధపడుతోంది. ఈ సమస్య ఉన్నవాళ్లు తరచూ నీరసానికి గురవుతుంటారు. నడిచినా, నిల్చున్నా తొందరగా అలిసిపోతుంటారు. కండరాలు విపరీతంగా నొప్పి పెడుతుంటాయి. కొన్నాళ్లుగా ఈ సమస్యతో బాధపడుతున్న సమంత, తగ్గిపోతుందని అలా వదిలేసింది. అయితే రోజురోజుకు సమస్య పెరగడంతో చికిత్స తీసుకోవాల్సి వచ్చిందని వెల్లడించింది.

తను శారీరకంగా, మానసికంగా ఎన్నో అడ్డంకుల్ని అధిగమించానని... ఈ శారీరక సమస్య కూడా తన నుంచి దూరంగా వెళ్లిపోతుందని ధైర్యంగా చెప్పుకొచ్చింది సమంత. ఈ సందర్భంగా చేతికి సెలైన్ బాటిల్ పెట్టుకొని, డబ్బింగ్ చెబుతున్న ఫొటోను పోస్ట్ చేసింది.

సమంత ప్రకటనతో ఆమె ఆరోగ్య పరిస్థితిపై ఇన్నాళ్లూ చెలరేగిన పుకార్లకు చెక్ పడింది. ప్రస్తుతం ఆమె యశోద సినిమా ప్రమోషన్స్ లో బిజీగా ఉంది. నవంబర్ 11న ఈ సినిమా థియేటర్లలోకి వస్తోంది.