శబరి మూవీ షూటింగ్ అప్ డేట్స్

వరలక్ష్మీ శరత్ కుమార్ ప్రధాన పాత్రలో నటిస్తున్న చిత్రం 'శబరి'. మహా మూవీస్ బ్యానర్ పై మహేంద్రనాథ్ నిర్మిస్తున్నారు. అనిల్ కాట్జ్ దర్శకుడిగా పరిచయం అవుతున్నాడు. తెలుగు, తమిళ, మలయాళ, హిందీ భాషల్లో పాన్ ఇండియా సినిమాగా ఇది వస్తోంది. తాజాగా కొడైకెనాల్‌లో 2 వారాల పాటు కీలక సన్నివేశాలను చిత్రీకరించారు.

కొడైకెనాల్ షెడ్యూల్‌లో వరలక్ష్మీ శరత్ కుమార్‌తో పాటు ముఖ్య తారాగణం అంతా పాల్గొన్నారు. అక్కడ 14 రోజులు షూటింగ్ చేశారు. ముఖ్యమైన సన్నివేశాలతో పాటు ఒక పాట, క్లైమాక్స్ షూట్ చేశారు. ఫైట్ మాస్టర్స్ నందు - నూర్ నేతృత్వంలో యాక్షన్ ఎపిసోడ్స్ తీయగా... పాటకు సుచిత్రా చంద్రబోస్ కొరియోగ్రఫీ చేశారు. త్వరలో విశాఖ షెడ్యూల్ ప్రారంభిస్తారు.

వరలక్ష్మీ శరత్ కుమార్ ఇంతకు ముందు ఎప్పుడూ చేయని కొత్త పాత్రను 'శబరి'లో పోషిస్తోంది. కూతుర్ని కాపాడుకోవడం కోసం ప్రాణాలకు తెగించే తల్లి పాత్రను వరలక్ష్మీ శరత్ కుమార్ పోషిస్తోంది. ఇండిపెండెంట్ లేడీగా, స్వతంత్ర భావాలున్న ఆధునిక యువతిగా, కూతురి క్షేమం కోసం ప్రాణాన్ని సైతం పణంగా పెట్టి, కంటికి కనిపించని చీకటి మృగంతో ఒంటరి సైన్యంలా పోరాడే పాత్రలో వరలక్ష్మి కనిపించనుంది.

క్రైమ్ నేపథ్యంలో ఇంటెన్స్ సైకలాజికల్ థ్రిల్లర్‌గా రూపొందుతున్న చిత్రమిది. షూటింగ్ పూర్తయిన వెంటనే విడుదల తేదీని అధికారికంగా ప్రకటిస్తారు.