గాడ్ ఫాదర్... ఆ పుకార్లలో నిజం లేదు

చిరంజీవి హీరోగా నటిస్తున్న సినిమా గాడ్ ఫాదర్. ఈ సినిమా టీజర్ ఇటీవల రిలీజైంది. దసరా కానుకగా అక్టోబర్ 5న విడుదల చేయబోతున్నట్టు ఘనంగా ప్రకటించారు కూడా. అంతలోనే ఈ సినిమాపై పుకార్లు మొదలయ్యాయి.

గాడ్ ఫాదర్ సినిమాను వాయిదా వేస్తున్నారంటూ ఊహాగానాలు చెలరేగాయి. అక్టోబర్ 5న కాకుండా, 2 వారాలు ఆలస్యంగా ఈ సినిమా వచ్చే అవకాశం ఉందంటూ కథనాలు వస్తున్నాయి. వీటిపై యూనిట్ వెంటనే స్పందించింది. గాడ్ ఫాదర్ నిర్మాతల్లో ఒకరైన ఎన్వీ ప్రసాద్, ఈ పుకార్లపై స్పష్టత ఇచ్చారు.

గాడ్ ఫాదర్ సినిమా విడుదల వాయిదా అంటూ వస్తున్న పుకార్లలో ఒక్క శాతం కూడా నిజం లేదని స్పష్టం చేశారు. అక్టోబర్ 5న విడుదల చేయడం కోసం భారీ ప్రచారానికి ప్లాన్ చేస్తున్నామని, అంతలోనే ఇలాంటి పుకార్లు రావడం బాధాకరం అన్నారాయన.

ఈ సినిమాకు సంబంధించి ఫస్ట్ సింగిల్ ను రిలీజ్ చేయడానికి యూనిట్ రెడీ అవుతోంది. ఇలా వరుసగా సాంగ్స్ రిలీజ్ చేస్తూనే, మరోవైపు సినిమా నుంచి కొన్ని మేకింగ్ షాట్స్ కూడా విడుదల చేయాలని అనుకుంటున్నారట.

ఇక ఈ సినిమా ప్రీ-రిలీజ్ ఫంక్షన్ ను భారీ ఎత్తున చేయబోతున్నారు. అయితే వేదిక హైదరాబాద్ ఉండకపోవచ్చు. ప్రస్తుతానికైతే అనంతపురం, ముంబయిలో ప్రీ-రిలీజ్ ఫంక్షన్లు చేయాలని అనుకుంటున్నారు.

తెలుగు, హిందీ భాషల్లో ఒకేసారి విడుదలకానుంది గాడ్ ఫాదర్ సినిమా. బాలీవుడ్ స్టార్ హీరో సల్మాన్ ఖాన్ ఇందులో కీలక పాత్ర పోషించిన సంగతి తెలిసిందే. నయనతార, సత్యదేవ్, సునీల్ ఈ సినిమాలో కీలక పాత్రలు పోషించారు. తమన్ సంగీత దర్శకుడు.