థియేటర్ వద్ద లొల్లి.. ఆదిపురుష్ బాగాలేదన్న యువకుడిని చితక్కొట్టిన ఫ్యాన్స్

ప్రభాస్ హీరోగా నటించిన ఆదిపురుష్ మూవీ ఇవాళ ప్రపంచవ్యాప్తంగా రిలీజ్ అయింది. మొత్తం 6,200 థియేటర్లలో ఈ సినిమాను విడుదల చేశారు. ఇప్పటికే చాలా చోట్ల షోలు పడ్డాయి. టాక్ కూడా బయటకు వస్తోంది. రివ్యూ పరంగా చూసుకుంటే ఈ సినిమాకు మిశ్రమ స్పందన వస్తోంది. రామాయణాన్ని నేటి కాలానికి తగ్గట్టుగా ఓం రౌత్ ట్రెండీగా తెరకెక్కించారని, విజువల్స్ అద్భుతమని చెబుతున్నారు. రాముడిగా ప్రభాస్ బాగా సూట్ అయ్యారని అంటున్నారు. అయితే సినిమా లెంగ్తీగా ఉందని, కొన్ని సన్నివేశాలు సాగదీశారని ఇవే సినిమాకు మైనస్ అని మరికొందరు చెబుతున్నారు.

ఇదిలా ఉంటే హైదరాబాద్‌లో ప్రసాద్ ఐమ్యాక్స్ వద్ద ఆదిపురుష్ మూవీ బాగాలేదని చెప్పిన యువకుడిని ఫ్యాన్స్ అందరూ కలిసి చితక్కొట్టారు. ఉదయం ఫ్యాన్స్ షో పూర్తవగానే థియేటర్ నుంచి బయటికి వస్తున్న ప్రేక్షకులను సినిమా ఎలా ఉంది? అని కొందరు మీడియా ప్రతినిధులు ప్రశ్నించారు.

ఓ యువకుడు సినిమా బాగాలేదని చెప్పాడు. మరీ లెంగ్తీగా ఉందని, పిల్లల ఆటల్లో బొమ్మల్లాగా రాక్షసులను చూపారని, ప్రభాస్‌ని గ్రాఫిక్స్ లో చూపినట్లుగా ఉందని చెప్పాడు. దీంతో పక్కనే ఉన్న ప్రభాస్ ఫ్యాన్స్ రెచ్చిపోయారు. థియేటర్ వద్ద నుంచి వెళ్ళిపోవాలని యువకుడికి సూచించారు. అయినా అతడు వెళ్లకపోవడంతో మీడియా సమక్షంలోనే ఫ్యాన్స్ అంతా కలిసి యువకుడిని చితకబాదారు. ఇందుకు సంబంధించిన వీడియోలు ప్రస్తుతం సోషల్ మీడియాలో వైరల్ అవుతున్నాయి. సినిమాపై ఎవరి అభిప్రాయం వారిదని, బాగాలేదు అని చెప్పినందుకే దాడి చేయడం పద్ధతి కాదని నెటిజన్లు సూచిస్తున్నారు.