సూపర్ హిట్ సినిమాకు మరో సీక్వెల్

వరుసపెట్టి సీక్వెల్స్ రావడం ఇన్నాళ్లూ బాలీవుడ్ లోనే చూశాం. మూడో భాగం వరకు వచ్చిన సౌత్ సినిమాలు ఇప్పటివరకు లేవు. ఇప్పుడీ ట్రెండ్ ను దృశ్యం సినిమా స్టార్ట్ చేయబోతోంది. అవును.. సూపర్ హిట్టయిన దృశ్యంకు పార్ట్-3 కూడా వస్తోంది.

అన్ని భాష‌ల్లోనూ సూప‌ర్ హిట్ అయిన మూవీ దృశ్యం. మోహ‌న్ లాల్ హీరోగా న‌టించిన ఈ సినిమా బెస్ట్ స్క్రీన్ ప్లేకి ప‌ర్‌ఫెక్ట్ ఎగ్జాంపుల్. తెలుగులో ఈ చిత్రంలో వెంక‌టేశ్‌, మీనా, నదియా, న‌రేశ్ త‌దిత‌రులు న‌టించిన సంగతి తెలిసిందే.

ఇటీవ‌ల వ‌చ్చిన దృశ్యం రెండో భాగం కూడా ప్రేక్షకుల్ని మెప్పించింది. మలయాళం, తెలుగులో మరోసారి హిట్టయింది. తాజాగా ఈ చిత్రం మూడో పార్ట్ కోసం రెడీ అవుతున్నారు మ‌ల‌యాళ న‌టుడు మోహ‌న్ లాల్‌. దృశ్యం 3 లోడింగ్ అంటూ ద‌ర్శ‌కుడు జీతూ జోసెఫ్ అప్‌డేట్ ఇచ్చారు.

ఈ సందర్భంగా రిలీజ్ చేసిన పోస్టర్‌‌‌‌లో ఒక టేబుల్ ముందు కూర్చుని తీక్షణంగా చూస్తున్నారు మోహన్ లాల్. ఆయన చేతికి బేడీలున్నాయి. దాన్నిబట్టి అది ఇంటరాగేషన్ సీన్ అని అర్థమవుతోంది. ఇలా దృశ్యం-3 అప్ డేట్ ను పోస్టర్ తో సహా వెల్లడించారు మేకర్స్.

తన తెలివితేటలతో హీరో, తన కుటుంబాన్ని ఎలా కాపాడుకున్నాడనేది 2 భాగాల్లో చూపించాడు దర్శకుడు. మరి మూడో పార్ట్‌‌లో ఏం చేయబోతున్నారో తెలియాలంటే కొన్ని రోజులు ఆగాల్సిందే.