గుర్తుపెట్టుకో..ఏదో ఒకరోజు మీకు వడ్డీతో సహా తిరిగి వస్తుంది
ధనుష్‌ను ఉద్దేశించే నయనతారా పరోక్షంగా పోస్టు పెట్టారని పలువురి భావన
'నయనతార: బియాండ్‌ ది ఫెయిరీ టేల్‌' డాక్యుమెంటరీ విషయంలో నటి నయనతార, నటుడు ధనుష్‌ మధ్య వివాదం నెలకొన్న సంగతి తెలిసిందే. కొన్నిరోజులుగా కోలీవుడ్‌లో ఇది చర్చనీయాంశంగా మారింది. ఈ నేపథ్యంలో నయన్‌ తాజాగా షేర్‌ చేసిన మెసేజ్‌ నెట్టింట వైరల్‌గా మారింది. కర్మ సిద్ధాంతాన్ని ఉద్దేశించి ఆమె ఈ పోస్ట్‌ పెట్టారు. 'అబద్ధాలతో పక్క వారి జీవితాన్ని నాశనం చేస్తే.. దానిని మరొక అప్పుగా భావించండి. ఏదో ఒక రోజు మీకు వడ్డీతో సహా తిరిగి వస్తుందని గుర్తుపెట్టుకోండి' అనేది దీని సారాంశం. ధనుష్‌తో వివాదం నెలకొన్న తరుణలో ఆమె షేర్‌ చేసిన ఈ మెసేజ్‌ వైరల్‌గా మారింది.
'నానుమ్‌ రౌడీ దాన్‌'కు సంబంధించిన మూడు సెకన్ల క్లిప్‌ డాక్యుమెంటరీ ట్రైలర్‌లో వాడుకున్నందుకు ధనుష్‌ రూ. 10 కోట్ల నష్టపరిహారం డిమాండ్‌ చేశారని నయనతారా ఆరోపించారు. ఈ మేరకు లీగల్‌ నోటీసులు పంపించారన్నారు. దీనిపై నయన్‌ ఆగ్రహం వ్యక్తం చేశారు. ధనుష్‌ తీరును తప్పుపడుతూ మూడు పేజీల బహిరంగ లేఖ విడుదల చేశారు. ఈ వ్యవహారం కోలీవుడ్‌లో తీవ్ర కలకలం సృష్టించాయి. వివాదానికి కారణమైన సన్నివేశాలను మాత్రం డాక్యుమెంటరీలో అలాగే ఉంచారు. ఈ క్రమంలోనే ధనుష్‌ ఇటీవల మద్రాస్‌ హైకోర్టు ఆశ్రయించారు. నయన్‌-విఘ్నేష్‌ దంపతులపై దావా వేశారు. ఈ నేపథ్యంలోనే నయనతారా పరోక్షంగా ధనుష్‌ను ఉద్దేశించి పోస్టు పెట్టారని పలువురు భావిస్తున్నారు.
