నాగచైతన్య కొత్త సినిమా అప్ డేట్
వెంకట్ ప్రభు దర్శకత్వంలో యాక్షన్ ఎంటర్ టైనర్ చేస్తున్నాడు చైతూ. ఈ సినిమా ఎంత వరకు వచ్చిందో చెక్ చేద్దాం..
నాగచైతన్య, వెంకట్ ప్రభు క్రేజీ కాంబినేషన్‌లో సినిమా తెరకెక్కుతున్న సంగతి తెలిసిందే. నాగచైతన్య సరసన కృతి శెట్టి హీరోయిన్ గా నటిస్తోంది. అరవింద్ స్వామి, ప్రియమణి, జీవా, వరలక్ష్మి శరత్ కుమార్ లాంటి ప్రముఖులు ఇందులో కీలక పాత్రలు పోషిస్తున్నారు.
ఈ సినిమాకు సంబంధించి లేటెస్ట్ అప్‌డేట్ ఏంటంటే.. రీసెంట్‌గా సెట్స్‌పైకి వెళ్లిన ఈ సినిమా మైసూర్‌లో కీలక షెడ్యూల్‌ని పూర్తి చేసుకుంది. ఈ షెడ్యూల్‌లో నాగచైతన్యకు సంబంధించిన కీలక సన్నివేశాలను చిత్రీకరించారు. మైసూర్‌లోని అందమైన లొకేషన్లలో ఈ షెడ్యూల్‌ పూర్తయింది.
ఈ చిత్రంలో నాగచైతన్య కొత్తగా కనిపించనున్నాడు. చైతన్య కెరీర్‌లో భారీ బడ్జెట్ సినిమాగా ఇది తెరకెక్కుతోంది. శ్రీనివాసా సిల్వర్ స్క్రీన్ బ్యానర్‌పై శ్రీనివాస చిట్టూరి ఈ చిత్రాన్ని నిర్మిస్తున్నాడు.
ఈ చిత్రానికి దిగ్గజ సంగీత దర్శకులైన తండ్రీకొడుకులు ఇళయరాజా, యువన్ శంకర్ రాజా సంగీతం అందిస్తున్నారు. తండ్రికొడుకులు కలిసి పనిచేయడం ఇదే తొలిసారి. స్టార్ డైలాగ్ రైటర్ అబ్బూరి రవి మాటలు అందిస్తున్నాడు.
