Mr bachchan | మిస్టర్ బచ్చన్ ఒరిజినల్ కంటే బాగుంటుందంట!

హరీష్ శంకర్‌ని 'రీమేక్ రాజా' అని పిలుస్తుంటారు. అతని చిత్రాల్లో ఎక్కువ భాగం రీమేక్ లే. గబ్బర్ సింగ్ (దబాంగ్ రీమేక్), గద్దలకొండ గణేష్ (జిగర్తాండ రీమేక్) లాంటి సినిమాల్ని రీమేక్ చేశాడు హరీశ్.

ఇప్పుడీ దర్శకుడు మిస్టర్ బచ్చన్ సినిమా తీశాడు. ఇది కూడా రీమేకే. హిందీలో సూపర్ హిట్టయిన రైడ్ సినిమాకు రీమేక్ ఇది. అజయ్ దేవగన్ ప్రధాన పాత్రలో నటించిన ఈ సినిమా 2018లో వచ్చింది. రాజ్ కుమార్ గుప్తా దర్శకత్వం వహించాడు. తెలుగులో అజయ్ దేవగన్ పాత్రను రవితేజ పోషించాడు.

15వ తేదీన థియేటర్లలోకి వస్తోంది మిస్టర్ బచ్చన్ సినిమా. హిందీలో వచ్చిన రైడ్ కంటే మిస్టర్ బచ్చన్ చాలా బాగుంటుందంటున్నాడు హరీశ్. ఒరిజినల్ సినిమాలో ఏ అంశాలైతే ఉంటే బాగుంటుందని తను ఫీలయ్యానో, అవన్నీ మిస్టర్ బచ్చన్ లో పెట్టానంటున్నాడు.

తాను ఎప్పుడూ సినిమాను ఉన్నదున్నట్టుగా రీమేక్ చేయనని, తనదైన టచ్ జోడిస్తానని అంటున్నాడు హరీశ్. గతంలో మిరపకాయ్ సినిమాకు ఆ టైటిల్ ను రవితేజ పెట్టారని.. ఇప్పుడు మిస్టర్ బచ్చన్ టైటిల్ కూడా రవితేజనే పెట్టారని చెప్పుకొచ్చాడు.