ఇలాంటి మట్టిలో మాణిక్యాలు ఎందరో!
ఈ అబ్బాయి కచ్చితంగా ఇండియన్‌ ఐడల్‌ సీజన్‌ 4లో పాడుతాడన్న మ్యూజిక్‌ డైరెక్టర్‌ తమన్‌
ప్రతి మనిషిలో ఏదో ఒక టాలెంట్‌ ఉంటుంది. సంగీతం నేర్చుకోకున్నా బాగాపాడేవారు చాలామంది ఉంటారు. ఈ క్రమంలో రాజు అనే అంధ గాయకుడి స్వరం ఇప్పుడు అందరి హృదయాలను హత్తుకుంటున్నది. అతను ఆర్టీసీ బస్సులో సరదాగా పాడిన పాట వైరల్‌గా మారిన సంగతి తెలిసిందే. కొన్నిరోజుల నుంచి ఈ వీడియో విస్తృతంగా వైరల్‌ అవుతున్నది. తాజాగా ఈ గాయకుడిని ఉద్దేశించి మ్యూజిక్‌ డైరెక్టర్‌ తమన్‌ పోస్ట్‌ పెట్టారు. అతను కచ్చితంగా ఇండియన్‌ ఐడల్‌లో పాడుతాడని హామీ ఇచ్చారు. ఈ మేరకు ఈ కార్యక్రమం ప్రసారమయ్యే ఓటీటీ సంస్థకు తమన్‌ విజ్ఞప్తి చేశారు.
'ఈ అబ్బాయి కచ్చితంగా ఇండియన్‌ ఐడల్‌ సీజన్‌ 4లో పాడుతాడు. అతనికి గొప్ప టాలెంట్‌ ఉన్నది. ఆ వేదికపై అతనితో కలిసి నేను ప్రదర్శన ఇస్తాను. శృతిలో ఎంత స్పష్టంగా పాడుతున్నాడో.. దేవుడు కొన్నిసార్లు కఠినంగా ఉన్నట్లు కనిపిస్తాడు. అయితేనేం .. అతని టాలెంట్‌ను గుర్తించి అవకాశం ఇవ్వడానికి మనం ఉన్నాం కదా' అని పోస్టులో తమన్‌ పేర్కొన్నారు. ఇక నాలుగు రోజుల కిందట ఈ యువకుడి టాలెంట్‌పై ఆర్టీసీ ఎండీ సజ్జనార్‌ కూడా పోస్ట్‌ పెట్టారు. ఆ యువకుడికి ఒక్క ఛాన్స్‌ ఇవ్వండి అంటూ ప్రముఖ సంగీత దర్శకుడు ఎంఎం కీరవాణిని కోరారు. 'మనం చూడాలే కానీ.. ఇలాంటి మట్టిలో మాణిక్యాలు ఎన్నో..! ఈ అంధ యువకుడు అద్భతంగా పాడారు కదా.. ఒక్క అవకాశం ఇచ్చి చూడండి కీరవాణి సర్‌' అని సజ్జనార్‌ కోరారు.
