2025 ఆస్కార్‌ ఎంట్రీకి 'లాపతా లేడీస్‌'
2025 ఆస్కార్‌కు మన దేశం నుంచి ఎంపికైందని ఫిల్మ్‌ ఫెడరేషన్‌ ఆఫ్‌ ఇండియా అధికారిక ప్రకటన
బాలీవుడ్‌ నటుడు అమీర్‌ఖాన్‌ మాజీ సతీమణి కిరణ్‌రావు డైరెక్షన్‌లో వచ్చిన 'లాపతా లేడీస్‌' అరుదైన ఘనతను సొంతం చేసుకున్నది. 2025 ఆస్కార్‌కు మన దేశం నుంచి ఎంపికైంది. ఫిల్మ్‌ ఫెడరేషన్‌ ఆఫ్‌ ఇండియా ఈ విషయాన్ని అధికారికంగా ప్రకటించింది.
మన దేశం తరఫున ఈ సినిమా ఆస్కార్‌కు కచ్చితంగా ఎంపికవుతుందని కిరణ్‌రావు ఇటీవల ఓ ఇంటర్వ్యూలో ధీమా వ్యక్తం చేశారు. '2025లో ఆస్కార్‌ అవార్డుల్లో భారత్‌ తరఫున అధికారికంగా 'లాపతా లేడీస్‌' అర్హత సాధిస్తుందని నాకు పూర్తి విశ్వాసం ఉన్నది. ఈ సినిమా ఆస్కార్‌ వేదికపై మన దేశానికి ప్రాతినిధ్యం వహించాలనేది నాతో పాటు మా యూనిట్‌ సభ్యులందరి కోరిక' అని కిరణ్ రావు ఆ ఇంటర్వ్యూలో చెప్పారు.
2025 ఆస్కార్‌కు మన దేశం నుంచి 'లాపతా లేడీస్‌' సినిమా ఎంట్రీకి పంపనున్నట్లు ఫిల్మ్‌ ఫెడరేషన్‌ ఆఫ్‌ ఇండియా తెలిపింది. ఆట్టం, యానిమల్‌ తదితర 29 సినిమాల లిస్ట్‌ నుంచి ఈ సినిమాను ఎంచుకున్నారు.2001నాటి చిత్ర కథ ఇది. గ్రామీణ ప్రాంతానికి చెందిన ఇద్దరు నవ వధువులు రైలు ప్రయాణంలో అనుకోకుండా తారుమారైన సంఘటన ఇతివృత్తంగా ఈ సినిమాను తెరకెక్కించారు. ప్రముఖ నటుడు అమీర్‌ఖాన్‌ నిర్మించిన ఈ మూవీ ఇటీవల విడుదలై ఘన విజయం సాధించిన విషయం విదితమే. స్పర్శ్‌ శ్రీవాస్తవ, నితాన్షి గోయెల్‌, ప్రతిభ తదితరులు ప్రధాన పాత్రలో నటించారు. ప్రతిష్టాత్మక టోరంటో ఇంటర్నేషనల్‌ ఫిల్మ్‌ ఫెస్టివల్‌ వేడుకల్లో గత ఏడాది ఈ మూవీని ప్రదర్శించడం గమనార్హం. సుప్రీంకోర్టు 75 ఏళ్ల వేడుకలో భాగంగా.. అడ్మినిస్ట్రేటివ్‌ భవనంలోని సి-బ్లాక్‌లో ని ఆడిటోరియంలో ఈ సినిమాను ప్రదర్శించారు. అలాగే ఇండియన్‌ ఫిల్మ్‌ ఫెస్టివల్‌ ఆఫ్‌ మెల్‌బోర్న్‌ అవార్డుల్లోనూ లపతా లేడీస్‌ క్రిటిక్స్‌ ఛాయిస్‌ విభాగంలో బెస్ట్‌ ఫిల్మ్‌గా నిలిచింది.
