Chandamama 2 | చందమామ-2 వస్తుందా?

చందమామ.. కృష్ణవంశీ తీసిన సూపర్ హిట్ సినిమాల్లో ఒకటి. ఎలాంటి స్టార్ కాస్ట్ లేకుండా ఈ సినిమా తీసి హిట్ కొట్టాడు కృష్ణవంశీ. ఈ సినిమా పాటలన్నీ సూపర్ హిట్టయ్యాయి. కేఎం రాధాకృష్ణన్ అందించిన సంగీతం ఈ సినిమాకు పెద్ద ఎస్సెట్.

నవదీప్, శివబాలాజీ, కాజల్, సింధు మీనన్ హీరోహీరోయిన్లుగా తెరకెక్కిన ఈ సినిమా ఇప్పుడు మరోసారి వార్తల్లోకెక్కింది. ఈ సినిమా సీక్వెల్ పై తాజాగా స్పందించాడు దర్శకుడు కృష్ణవంశీ.

మురారి రీ-రిలీజ్ సందర్భంగా ప్రేక్షకులతో సోషల్ మీడియాలో టచ్ లోకి వచ్చాడు కృష్ణవంశీ. ఈ సందర్భంగా చందమామ సీక్వెల్ పై ఓ నెటిజన్ ప్రశ్న అడిగాడు. దీనిపై కృష్ణవంశీ సూటిగా స్పందించాడు.

ఎట్టిపరిస్థితుల్లో చందమామ సినిమాకు సీక్వెల్ రాదని స్పష్టం చేశాడు ఈ దర్శకుడు. అసలు ఓ సినిమాకు సీక్వెల్స్ ఎలా తీస్తారో తనకు బొత్తిగా అర్థంకావడం లేదంటూ స్పందించాడు. కృష్ణవంశీ తాజా స్టేట్ మెంట్ తో చందమామ సీక్వెల్ పైనే కాదు, అతడి చిత్రాలన్నింటిపై క్లారిటీ వచ్చేసింది. తను సీక్వెల్స్ కు వ్యతిరేకం అనే విషయం అందరికీ అర్థమైంది.