హిట్-2 విడుదల తేదీ ఫిక్స్

ఈ ఏడాది మేజ‌ర్ సినిమాతో భారీ హిట్ సాధించిన హీరో అడివి శేష్‌. ఈయ‌న హీరోగా న‌టిస్తోన్న లేటెస్ట్ మూవీ 'హిట్ 2'. హీరో నానికి చెందిన వాల్‌పోస్టర్‌ సినిమా బ్యానర్‌పై ప్రశాంతి త్రిపిర్‌నేని నిర్మిస్తోన్న సీట్ ఎడ్జ్ క్రైమ్ ఇన్వెస్టిగేష‌న్ క్రైమ్ థ్రిల్ల‌ర్ 'హిట్‌2'. హిట్‌ సినిమాకు ఫ్రాంచైజీగా 'హిట్ ‌2 ద సెకండ్ కేస్‌' చిత్రాన్ని రూపొందిస్తోన్న సంగతి తెలిసిందే. హిట్ సినిమాతో ఆడియెన్స్ ను మెప్పించిన ద‌ర్శ‌కుడు శైలేష్ కొల‌ను ద‌ర్శ‌క‌త్వంలోనే హిట్ 2 ద సెకండ్ కేస్ సినిమా రూపొందుతోంది.

తాజాగా ఈ సినిమా విడుదల తేదీని ప్రకటించారు. డిసెంబ‌ర్ 2న 'హిట్ ‌2 ద సెకండ్ కేస్‌' సినిమా థియేటర్లలోకి వస్తుంది. ఎవ‌రు, గూఢ‌చారి వంటి చిత్రాల‌తో వ‌రుస సూప‌ర్ హిట్స్ కొట్టిన టాలెంటెడ్ హీరో అడివి శేష్ ఇందులో కృష్ణ దేవ్‌ అలియాస్‌ కె.డి పాత్రలో కనిపించనున్నాడు.

తెలంగాణ రాష్ట్రానికి చెందిన పోలీస్‌ ఆఫీసర్‌ అమ్మాయి మిస్సింగ్‌ కేసుని హీరో ఎలా డీల్‌ చేశాడనే కాన్సెప్ట్‌తో హిట్‌ ‌(మోమిసైడ్‌ ఇంటర్‌వెన్షన్‌ టీమ్‌) సినిమాను రూపొందించిన సంగతి తెలిసిందే. ఇప్పుడు ఆంధ్రప్రదేశ్‌ చెందిన హిట్‌ టీమ్‌ ఆఫీసర్‌ కృష్ణ దేవ్‌ అలియాస్‌ కె.డి ఈ ఎగ్జయిటింగ్‌ జర్నీతో ప్రేక్ష‌కుల ముందుకు రాబోతున్నాడు.

హిట్ సినిమాను శైలేష్ కొల‌ను సీట్ ఎడ్జ్ థ్రిల్ల‌ర్‌గా తెర‌కెక్కించి డైరెక్ట‌ర్‌గా త‌నేంటో ప్రూవ్ చేసుకున్నారు. అలాగే హిందీలోనూ హిట్ సినిమాను అదే పేరుతో రీమేక్ చేసి అక్క‌డ కూడా హిట్ సాధించారు. ఇప్పుడు హిట్ ఫ్రాంఛైజీగా హిట్ 2 సినిమాను మరింత ఆసక్తికరమైన కథనంతో తీసుకొస్తున్నారు.

హిట్ 2 రిలీజ్ డేట్‌ను డిసెంబ‌ర్ 2గా అనౌన్స్ చేయ‌టంతో పాటు రిలీజ్ డేట్‌ పోస్టర్‌ని కూడా రిలీజ్‌ చేశారు ద‌ర్శ‌క నిర్మాత‌లు. మ‌ణి కంద‌న్ సినిమాటోగ్రఫీ అందిస్తున్న ఈ చిత్రానికి జాన్‌ స్టీవర్ట్‌ ఎడురి సంగీతాన్ని అందిస్తున్నాడు.