'సితార' నుంచి మరో ప్రయోగం

డీజే టిల్లూ లాంటి ప్రయోగంతో హిట్ కొట్టిన సితార ఎంటర్ టైన్ మెంట్స్ సంస్థ, మరో ప్రయోగానికి శ్రీకారం చుట్టింది. ఈసారి బుట్టబొమ్మ అనే మరో చిన్న సినిమాను ప్రయోగాత్మకంగా సిద్ధం చేసింది. త్రివిక్రమ్ కు చెందిన ఫార్చ్యూన్ ఫోర్ సినిమాస్, ఈ సినిమాకు సహ-నిర్మాతగా వ్యవహరిస్తోంది.

అనిక సురేంద్రన్ హీరోయిన్ గా.. అర్జున్ దాస్, సూర్య వశిష్ట హీరోలుగా ఈ సినిమా రాబోతోంది. దీనికి "బుట్ట బొమ్మ" అనే పేరును ఖరారు చేస్తూ వినాయకచవితి పర్వదినాన చిత్రం పేరుతో పోస్టర్ ను విడుదల చేశారు. నాగ‌వంశీ, సాయి సౌజ‌న్య‌ ఈ చిత్రానికి నిర్మాతలు. శౌరి చంద్రశేఖర్ రమేష్ దర్శకుడిగా పరిచయం అవుతున్నాడు.

విడుదలైన ప్రచార చిత్రంలో హీరోయిన్ అనిక సురేంద్రన్ 'బుట్ట బొమ్మ'గా ఎంతో అందంగా కనిపిస్తోంది. గ్రామీణ నేపథ్యంలో సాగే ఈ ప్రేమ కథ చాలా సహజంగా సాగుతుందని.. 'ప్రేమ' లోని పలు సున్నితమైన పార్శ్వాలను స్పృశిస్తూ చిత్ర కథ, కథనాలు ఉంటాయని యూనిట్ అంటోంది.

సెప్టెంబర్ నెలలో జరిగే షూటింగ్ తో చిత్ర నిర్మాణం పూర్తవుతుంది. నవంబర్ నెలలో బుట్టబొమ్మను విడుదల చేస్తారు. గోపీసుందర్ ఈ సినిమాకు సంగీత దర్శకుడు. ఇన్ని వివరాలు చెప్పిన మేకర్స్, ఓ విషయాన్ని మాత్రం బయటపెట్టలేదు. ఇదొక మలయాళ సినిమా రీమేక్.