Aditya 999 Max Movie: వచ్చే ఏడాది సెట్స్ పైకి 'ఆదిత్య 999 మ్యాక్స్ '.. ప్రకటించిన బాలకృష్ణ

బాలకృష్ణ సినీ కెరీర్లో ఆణిముత్యంగా నిలిచిన సినిమా ఆదిత్య 369. 1991లో విడుదలైన ఈ సినిమాకు సింగీతం శ్రీనివాసరావు దర్శకత్వం వహించారు. టైం మెషిన్ నేపథ్యంలో తెరకెక్కిన ఈ సినిమా అందరినీ విపరీతంగా ఆకట్టుకుంది. బాలయ్య క్రేజ్‌ని పెంచడమే కాకుండా మంచి వసూళ్లు సాధించింది. ఈ సినిమాకు సీక్వెల్ ఉంటుందని కొద్ది రోజులుగా వార్తలు వస్తున్నాయి. తాజాగా ఈ సినిమాపై బాలకృష్ణ ఒక క్లారిటీ ఇచ్చారు. వచ్చే ఏడాది ఈ సినిమాను సెట్స్ పైకి తీసుకెళ్లనున్నట్లు ప్రకటించాడు.

ఆహా ఓటీటీలో బాలకృష్ణ హోస్ట్‌గా చేస్తున్న అన్ స్టాపబుల్ షో మూడవ ఎపిసోడ్ తాజాగా విడుదలైంది. ఈ ఎపిసోడ్‌కు యంగ్ హీరోలు శర్వానంద్, అడివి శేష్ హాజరయ్యారు. ఇందులో తమ బ్రేకప్, కెరీర్ పరంగా ఎదురైన కష్టాలు, వివాదాల గురించి శర్వానంద్, అడివి శేష్ ఆసక్తికరమైన విషయాలను వెల్లడించారు. ఈ సందర్భంగా టైం మెషిన్ కాన్సెప్ట్ తో శర్వానంద్ ఇటీవల చేసిన ఒకే ఒక జీవితం సినిమా చాలా బాగుందని బాలయ్య ప్రశంసించాడు. ఈ సినిమా చూసిన తర్వాత తాను నటించిన ఆదిత్య 369 మూవీ గుర్తుకొచ్చిందని చెప్పాడు.

ఈ సందర్భంగా బాలకృష్ణ తాను రాసిన ఆదిత్య 999 మ్యాక్స్ సినిమాను వచ్చే ఏడాది సెట్స్‌పైకి తీసుకెళ్ళనున్నట్లు ప్రకటించాడు. ఆదిత్య 369కు సింగీతం శ్రీనివాసరావు దర్శకత్వం వహించగా.. సీక్వెల్‌కు మాత్రం తానే సొంతంగా దర్శకత్వం వహిస్తానని గతంలోనే బాలయ్య ప్రకటించాడు. అంతేకాదు సొంతంగా కథ కూడా అందిస్తున్నట్లు చెప్పాడు. ఈ సినిమా ద్వారానే బాలకృష్ణ తనయుడు మోక్షజ్ఞ సినీ ఇండస్ట్రీలోకి ఎంట్రీ ఇస్తారని కూడా ప్రచారం జరుగుతోంది. ఆదిత్య 369 సీక్వెల్ కోసం నందమూరి అభిమానులు ఎన్నో ఏళ్లుగా ఎదురుచూస్తుండగా తాజాగా ఈ సినిమాను వచ్చే ఏడాది సెట్స్‌పైకి తీసుకెళ్లనున్నట్లు బాలయ్య ప్రకటించడంతో ఆయన అభిమానులు ఆనందం వ్యక్తం చేస్తున్నారు.