మరో హీరోను ముగ్గులోకి దింపిన ఏషియన్
Asian Daggubati - ఏషియాన్ సంస్థ, ఈసారి దగ్గుబాటి హీరోలపై దృష్టిపెట్టింది. వాళ్లతో కలిసి మల్టీప్లెక్స్ స్టార్ట్ చేస్తోంది.
మల్టీప్లెక్స్ బిజినెస్ లోకి రావాలనుకునే హీరోలకు కేరాఫ్ గా మారింది ఏషియన్ సినిమాస్ గ్రూప్. ఇప్పటికే మహేష్, విజయ్ దేవరకొండ, అల్లు అర్జున్ తో మల్టీప్లెక్స్ వ్యాపారాలు చేస్తున్న ఈ సంస్థ, ఇప్పుడు దగ్గుబాటి కుటుంబాన్ని కూడా ఇందులోకి ఆకర్షిస్తోంది.
త్వరలోనే ఏషియన్ గ్రూప్, దగ్గుబాటి కుటుంబం కలిసి ఓ మల్టీప్లెక్స్ ను స్టార్ట్ చేయబోతున్నాయి. హైదరాబాద్ ఆర్టీసీ క్రాస్ రోడ్స్ లో ఉన్న ప్రముఖ థియేటర్ సుదర్శన్ 70ఎఎంను వీళ్లు రీ-మోడలింగ్ చేయబోతున్నారు. తెలుగు రాష్ట్రాల్లో చాలా ప్రాముఖ్యం కలిగిన థియేటర్ ఇది. ఇప్పుడీ థియేటర్ ను ఏషియన్ గ్రూప్ తో కలిసి దగ్గుబాటి కుటుంబం దక్కించుకుంది.
దీన్ని మల్టీప్లెక్స్ చేయబోతున్నారు. ఆ తర్వాత సుదర్శన్ అనే పేరు కనుమరుగుకానుంది. తమ శైలిలోనే ఈ మల్టీప్లెక్స్ కు ఏషియన్ విక్టరీ అనే పేరు పెట్టబోతున్నారు. ఇక్కడ విక్టరీ అంటే విక్టరీ వెంకటేష్ అని అర్థం.
మహేష్ బాబుతో కలిసి ఓ మల్టీప్లెక్ట్ పెట్టింది ఏషియన్ గ్రూప్. దానికి ఏఎంబీ అని పేరు పెట్టారు. తాజాగా బన్నీతో కలిసి సత్యం థియేటర్ కూలగొట్టి, ఆ స్థానంలో ఓ మల్టీప్లెక్స్ పెట్టారు. దానికి ఏఏఏ సినిమాస్ అని పేరు పెట్టారు. అటు మహబూబ్ నగర్ లో విజయ్ దేవరకొండతో కలిసి ఓ మల్టీప్లెక్స్ స్టార్ట్ చేశారు. ఇప్పుడు వెంకటేష్-రానాతో కలిసి మల్టీప్లెక్స్ స్థాపించబోతున్నారు.
