బాలయ్య-అనీల్ రావిపూడి.. కథాచర్చలు పూర్తి

బాలకృష్ణ, అనీల్ రావిపూడి కాంబినేషన్ లో సినిమా లాక్ అయిన సంగతి తెలిసిందే. రావిపూడి చెప్పిన స్టోరీలైన్ కు బాలయ్య పచ్చ జెండా ఊపారు. అలా బాలయ్య నుంచి గ్రీన్ సిగ్నల్ అందుకున్న అనీల్ రావిపూడి, ఆ స్టోరీలైన్ ను డెవలప్ చేసే పనిలో పడ్డారు. ఎట్టకేలకు ఈ సినిమా స్క్రీన్ ప్లే పూర్తయింది. తన టీమ్ తో కలిసి కూర్చున్న అనీల్ రావిపూడి.. బాలయ్య సినిమాకు సంబంధించి ఫైనల్ డ్రాఫ్ట్స్ రెడీ చేశాడు.

త్వరలోనే బాలయ్యను కలిసి పూర్తి నెరేషన్ ఇవ్వబోతున్నాడు రావిపూడి. ఇది తండ్రికూతుళ్ల కథ. ఇందులో బాలకృష్ణ తండ్రిగా, శ్రీలీల కూతురిగా కనిపించబోతున్నారు. తన శైలికి భిన్నంగా పూర్తిగా ఎమోషనల్ యాంగిల్ లో ఈ సినిమాను తెరకెక్కించబోతున్నాడు అనీల్ రావిపూడి. దసరా తర్వాత సినిమా సెట్స్ పైకి వస్తుంది.

షైన్ స్క్రీన్ బ్యానర్ పై హరీశ్ పెద్ది, సాహు గారపాటి నిర్మాణంలో రాబోతున్న ఈ సినిమాలో హీరోయిన్ ఎవరనే విషయాన్ని ఇంకా కన్ ఫర్మ్ చేయలేదు. సంగీత దర్శకుడిగా తమన్ ను తీసుకున్నారు. ఇది పూర్తిగా బాలయ్య పాత్ర చుట్టూ తిరిగే కథ. ఓ ఆడపిల్ల తండ్రిగా అతడు కనిపిస్తూనే, బాలయ్య ఫ్యాన్స్ ఆశించే మాస్ ఎలిమెంట్స్ అన్నింటినీ ఇందులో యాడ్ చేశాడు అనీల్ రావిపూడి.

అయితే ఎఫ్2, ఎఫ్3 తరహాలో ఇందులో కామెడీ కనిపించదని ముందే చెబుతున్నాడు ఈ దర్శకుడు. తననుంచి ఓ సినిమా వస్తుందంటే, అందరూ కామెడీ ఆశిస్తారని, ఈ సినిమా నుంచి మాత్రం ఆ కోణం ఆశించొద్దని కోరుతున్నాడు.