Urvasivo Rakshasivo movie OTT: అప్పుడే 'ఆహా'లోకి అల్లు శిరీష్ మూవీ
Urvasivo Rakshasivo movie OTT release date: ఊర్వశివో రాక్షసివో సినిమా స్ట్రీమింగ్ కు రెడీ అయింది. థియేట్రికల్ రిలీజ్ కోసం ప్రచారం చేసిన యూనిట్, ఇప్పుడు ఓటీటీ స్ట్రీమింగ్ కోసం కూడా మరోసారి ప్రచారం చేయాలని నిర్ణయించింది.
నెల తిరక్కుండానే ఓటీటీలోకి వస్తోంది ఊర్వశివో రాక్షసివో మూవీ. అల్లు శిరీష్ హీరోగా నటించిన ఈ సినిమాను ఈనెల 9 నుంచి ఆహాలో స్ట్రీమింగ్ కు పెట్టబోతున్నారు.
జీఏ 2 పిక్చర్స్‌, శ్రీ తిరుమ‌ల ప్రొడ‌క్ష‌న్ బ్యాన‌ర్స్ రూపొందించిన ఈ చిత్రంలో వెన్నెల కిషోర్‌, సునీల్‌, ఆమ‌ని త‌దిత‌రులు ఇత‌ర కీల‌క పాత్ర‌ల్లో న‌టించారు. అను ఇమ్మాన్యుయేల్‌ హీరోయిన్. యూత్ ను టార్గెట్ చేస్తూ పూర్తి రొమాంటిక్ ఎంటర్ టైనర్ గా ఈ సినిమాను తెరకెక్కించారు.
థియేటర్లలో ఊర్వశివో రాక్షసివో సినిమాకు మంచి టాక్ వచ్చింది. అయితే అల్లు శిరీష్ హీరో కావడంతో, ఎక్కువమంది ప్రేక్షకులు ఈ సినిమా చూసేందుకు థియేటర్లకు రాలేదు. అలా హిట్ టాక్ వచ్చినా, కలెక్షన్లకు నోచుకోలేదు ఈ మూవీ.
ఇప్పుడీ సినిమా ఓటీటీలోకి రావడానికి రెడీ అవ్వడంతో చాలామంది మూవీని చూసేందుకు ఆసక్తిగా ఉన్నారు. ఫలితంగా ఆహా మరో విజయాన్ని అందుకునేందుకు రెడీగా ఉందన్నమాట.
ఈ చిత్రానికి రైటర్, డైరెక్టర్ రాకేష్ శశి. ప్ర‌తి సంబంధం దేనిక‌దే ప్ర‌త్యేకం. పెళ్లి మంచిదా.. లివ్ ఇన్ రిలేష‌న్ షిప్ మంచిదా అనే విషయాన్ని ఎవ్వరూ స్పష్టంగా చెప్పలేరు. అలాంటి ఓ ఆలోచ‌న‌తో ఆక‌ట్టుకునేలా ఊర్వశివో రాక్షసివో చిత్రాన్ని తెర‌కెక్కించాడు దర్శకుడు. 'ఆహా'లో డిసెంబ‌ర్ 9న 'ఊర్వశివో రాక్షసివో' ప్రీమియ‌ర్ కానుంది.
