అయోధ్యలో ఆదిపురుష్ హంగామా

పాన్ ఇండియా స్టార్ ప్రభాస్ నటిస్తున్న ప్రతిష్టాత్మక చిత్రం "ఆదిపురుష్". రామాయణ ఇతిహాస నేపథ్యంతో దర్శకుడు ఓంరౌత్ ఈ చిత్రాన్ని తెరకెక్కిస్తున్నాడు. కృతి సనన్ హీరోయిన్ గా నటిస్తోంది. సైఫ్ అలీఖాన్, సన్నీ సింగ్ ఇతర కీలక పాత్రలు పోషిస్తున్నారు. అత్యున్నత సాంకేతిక విలువలతో భారీ బడ్జెట్ తో టీ సిరీస్, రెట్రో ఫైల్స్ సంస్థలు ఈ సినిమాను నిర్మిస్తున్నాయి.

ఆదిపురుష్ అప్ డేట్ కోసం ప్రభాస్ అభిమానులతో పాటు సినీ ప్రియులు ఎంతగానో ఎదురుచూస్తున్నారు. వారి నిరీక్షణకు తెరదించుతూ ఆదిపురుష్ టీజర్ రిలీజ్, పోస్టర్ రిలీజ్ డేట్ ను యూనిట్ ప్రకటించింది.

అక్టోబర్ 2న శ్రీరాముడు జన్మించిన అయోధ్యలో ఆదిపురుష్ టీజర్ విడుదల వేడుక జరగనుంది. ఈ కార్యక్రమానికి భారీ ఎత్తున ఏర్పాట్లు చేస్తున్నారు. అదే వేదికపై ఆదిపురుష్ ఫస్ట్ లుక్ పోస్టర్ ను కూడా లాంఛ్ చేయబోతున్నారు.

ప్రభాస్, కృతి సనన్, దర్శకుడు ఓంరౌత్ తో పాటు యూనిట్ లోని కీలక సభ్యులంతా ఈ ఫంక్షన్ లో పాల్గొంటారు. వచ్చే ఏడాది సంక్రాంతి కానుకగా జనవరి 12న ఆదిపురుష్ సినిమాను ప్రపంచవ్యాప్తంగా భారీ ఎత్తున విడుదల చేయబోతున్నారు. ఐమాక్స్ ఫార్మాట్ తో పాటు త్రీడీలో ఈ సినిమా తెరపైకి రానుంది.

ఈ సినిమాలో శ్రీరాముడిగా కనిపిస్తాడు ప్రభాస్. ఇక సీతగా కృతి సనన్, లక్ష్మణుడిగా సన్నీ సింగ్ కనిపిస్తారు. ఇక కీలకమైన రావణాసుడి పాత్రలో సైఫ్ అలీఖాన్ కనిపించనున్నారు.