ఎయిర్ న్యూజిలాండ్ తో టీసీఎస్ 5 సంవత్సరాల ఒప్పందం

ఐటీసేవలు, కన్సల్టింగ్, వ్యాపార సంబంధిత సమస్యల పరిష్కారాలలో అగ్రగామిగా ఉన్న టాటా కన్సల్టెన్సీ సర్వీసెస్ (TCS), ఎయిర్‌లైన్ భారీ ఒప్పందంపై సంతకం చేసింది. డిజిటల్ మౌలిక సదుపాయాలను ఆధునీకరించడానికి, AI-ఆధారిత ఆవిష్కరణలలో ముందంజలో ఉండటానికి ఎయిర్ న్యూజిలాండ్‌తో ఐదేళ్ల పాటు భాగస్వామ్యంఈ సహకారం ఎయిర్ న్యూజిలాండ్ డిజిటల్ సామర్థ్యాలను మెరుగుపరచడం, కస్టమర్ల అనుభవాన్ని మెరుగుపరచడం, సిబ్బంది షెడ్యూలింగ్, గ్రౌండ్ సేవలతో సహా దాని వ్యాపారంలోని వివిధ అంశాలలో ఉపయోగపడటం లక్ష్యంగా పెట్టుకుంది. ముంబైలోని TCS బన్యన్ పార్క్ క్యాంపస్‌లో జరిగిన అధికారిక కార్యక్రమంలో ఈ ఒప్పందం వివరాలను కంపెనీ ప్రతినిధులు వెల్లడించారు. ప్రపంచంలోనే డిజిటల్ విధానాల్లో అత్యంత అభివృద్ధి చెందిన ఎయిర్‌లైన్‌గా ఎదగాలనే న్యూజిలాండ్ ఆకాంక్షకు తాజా ఒప్పందం ఎంతో సహకరించనుంది. ఈ కార్యక్రమంలో న్యూజిలాండ్ ప్రధాన మంత్రి క్రిస్టోఫర్ లక్సన్, టాటా గ్రూప్ చైర్మన్ నటరాజన్ చంద్రశేఖరన్, ఎయిర్ న్యూజిలాండ్ చీఫ్ ఎగ్జిక్యూటివ్ ఆఫీసర్ గ్రెగ్ ఫోరాన్, TCS చీఫ్ ఎగ్జిక్యూటివ్ ఆఫీసర్, మేనేజింగ్ డైరెక్టర్ కె.కృతివాసన్ పాల్గొన్నారు.

కస్లమర్ల అనుభవాన్ని మెరుగుపరచడమే ధ్యేయం

ఎయిర్ న్యూజిలాండ్ చీఫ్ ఎగ్జిక్యూటివ్ ఆఫీసర్ గ్రెగ్ ఫోరాన్ మాట్లాడుతూ, “అత్యాధునిక సాంకేతిక పరిజ్ఞానాలలో TCS నైపుణ్యాన్ని పెంచుకోవడం వల్ల కస్టమర్ అనుభవాన్ని మెరుగుపరచడానికి, కార్యకలాపాలను క్రమబద్ధీకరించడానికి, సైబర్ భద్రత, డేటా రక్షణ పట్ల మా నిబద్ధతను బలోపేతం చేయడానికి సహాయపడుతుంది. ఈ సహకారం భవిష్యత్తులో డిజిటల్‌గా ఎనేబుల్ చేయబడిన ఎయిర్‌లైన్‌గా ఉండాలనే మా దార్శనికతకు అనుగుణంగా ఉంటుంది. మేము సెప్టెంబర్ 2024లో TCSతో కలిసి పనిచేయడం ప్రారంభించాము” అని అన్నారు. "డిజిటల్‌గా అధునాతన విమానయాన సంస్థగా ఎదగాలనే ఎయిర్ న్యూజిలాండ్ ప్రయాణంలో భాగస్వామ్యం కావడంపై మేం సంతోషిస్తున్నాము" అని TCS చీఫ్ ఎగ్జిక్యూటివ్ ఆఫీసర్, మేనేజింగ్ డైరెక్టర్ కె. కృతివాసన్ అన్నారు. ఎయిర్ న్యూజిలాండ్ 49 దేశీయ, అంతర్జాతీయ గమ్యస్థానాలలో ఎయిర్ ప్యాసింజర్, కార్గో సేవలను అందిస్తోంది. ఏటా ఈ ఎయిర్‌లైన్ 3,400 కంటే ఎక్కువ విమానాల్లో 15 మిలియన్లకు పైగా ప్రయాణికులను గమ్యస్థానాలకు చేరవేస్తుంది.