దస్తూరి ( కవిత)

చేతి వేళ్ళ మధ్య

అందంగా ఇమిడి

రంగు రంగుల లేఖినీలతో

అప్పటి మన మనసు లాంటి

తెల్ల కాగితంపై

అలవోకగా రాసిన

అక్షరాలను

తిరిగి ముద్దాడాలని ఉంది!

కాలం మారి

కలాలు కనుమరుగై

అక్షరాలను మింగేసిన యంత్రాలు

టైప్ మిషన్,

అచ్చు మిషిన్లు

కంప్యూటర్ కీ బోర్డ్

రూపాలు గా ఉన్నా

వాటికి చేతితో వ్రాసిన దస్తూరి

ఆయువు పట్టుగా ఉండేది

సెల్ ఫోన్ మాయాజాలం

జాడ్యమై

రాత కనుమరుగై

మనిషి ఆలోచనలకు

కాగితం, కలం మధ్య

అన్యోన్యత కరిగి

బొటన వేలు మీట నొక్కటాలతో

జీవం లేని అక్షరాలన్నీ

తెరమీద

దర్శనమిస్తున్నాయి నేడు

అయితేనేమి..

వేగం పెరిగినా

ఆధునిక విజ్ఞానం

రాతను కబలించినా

స్పందించే హృదయ గతులను

కదిలించే భావాలను హరించే

మర మనుషులం కానందుకు

మనమింకా ధన్యులమే సుమా !

( నీ చేతి వ్రాత ముత్యాల్లా ఉంటాయి అన్న మిత్రుడి పొగడ్త విని )

- డా.కె.దివాకరా చారి