వైఎస్సార్సీపీ విన్నింగ్ బిగ్.. ఫొటోల సందడి
పార్టీపై అభిమానం ఉన్న చాలామంది ఫొటోలు దిగి సోషల్ మీడియాలో అప్ లోడ్ చేస్తున్నారు. ఆ ఫొటోలను పార్టీ అధికారిక ఖాతాల్లో వైరల్ చేస్తున్నారు.
మరికొద్ది గంటల్లో ఏపీ విజేత ఎవరో తేలిపోతున్న సందర్భంలో సోషల్ మీడియాలో కొత్త ట్రెండ్ మొదలైంది. YSRCP WINNING BIG అనే హ్యాష్ ట్యాగ్ తెగ వైరల్ అవుతోంది. అదే పేరుని వైట్ పేపర్ పై ప్రింట్ చేసి పట్టుకున్న ప్రజల ఫొటోలు వైసీపీ అధికారిక సోషల్ మీడియా ఖాతాల్లో కనపడుతున్నాయి. అన్ని వర్గాల మద్దతు తమకు ఉన్నదని చెబుతూ ఈ ఫొటోలను అప్ లోడ్ చేస్తోంది వైసీపీ.
వైసీపీ విజయం ఖాయమని అంటున్నారు ఆ పార్టీ నేతలు. అయితే మెజార్టీ ఎంత అనేదానిపై భిన్నాభిప్రాయాలు వ్యక్తమవుతున్నాయి. వైసీపీ విజయం ఖాయమని చెబుతున్న సర్వేలు కూడా గతంలో కంటే ఎక్కువ స్థానాలు రావని ఖరాఖండిగా చెప్పేస్తున్నాయి. 100 మార్కుని వైసీపీ దాటుతుందని మాత్రమే అంచనా వేస్తున్నాయి. అయితే ఆ పార్టీ నేతలు మాత్రం గతంకంటే మెరుగైన స్థానాలు సాధిస్తామంటున్నారు. అధికారంలోకి వచ్చిన తర్వాత ప్రజలకు మరింత మేలు చేశామని, ఆ మేలు తాలూకు ఓట్లు తమకు అదనపు బలం అవుతాయని అంటున్నారు. అంటే 2019లో అధికారంలో లేనప్పుడు వచ్చిన ఓట్లు, సీట్లకంటే 2024లో ప్రజలకు తాము మేలు చేసిన తర్వాత వచ్చే ఓట్లు, సీట్లు ఎక్కువగా ఉంటాయనేది ఆ పార్టీ అంచనా. అందుకే వైఎస్సార్సీపీ విన్నింగ్ బిగ్ అంటూ సోషల్ మీడియాలో మోత మోగిపోతోంది.
ఎన్నికల ఫలితాలకు టైమ్ దగ్గరపడేకొద్దీ వైసీపీ సోషల్ మీడియా మరింత యాక్టివ్ అవుతోంది. ప్రస్తుతం వైఎస్ జగన్ అగైన్ అనే హ్యాష్ ట్యాగ్ టాప్ ట్రెండింగ్ లో ఉంది. దానితోపాటు వైఎస్సార్సీపీ విన్నింగ్ బిగ్ అంటూ ఫొటోలతో సందడి మొదలైంది. పార్టీపై అభిమానం ఉన్న చాలామంది ఇలా ఫొటోలు దిగి సోషల్ మీడియాలో అప్ లోడ్ చేస్తున్నారు. ఆ ఫొటోలను పార్టీ అధికారిక ఖాతాల్లో వైరల్ చేస్తున్నారు.
