వైసీపీలో మరో వికెట్‌ డౌన్‌.. టీడీపీ గూటికి శిద్దా!
ఇటీవలి ఎన్నికల్లో వైసీపీ నుంచి తన కొడుకు శిద్దా సుధీర్‌ కోసం దర్శి టికెట్ ఆశించారు రాఘవరావు. ఐతే వైసీపీ బూచేపల్లి శివప్రసాద్ రెడ్డికి దర్శి టికెట్ కేటాయించడంతో ఆయన విజయం సాధించారు.
పార్టీలు అధికారం కోల్పోతే కొందరు నేతలు అధికార పార్టీలోకి వలస వెళ్లడం కామన్. ఇప్పుడు ఏపీలో అదే పరిస్థితి కనిపిస్తోంది. మాజీ మంత్రి శిద్దా రాఘవరావు వైసీపీకి రాజీనామా చేశారు. ఈ మేరకు వైసీపీ అధినేత జగన్‌కు తన రాజీనామా లేఖను పంపారు. వ్యక్తిగత కారణాలతో పార్టీని వీడుతున్నట్లు లేఖలో పేర్కొన్నారు. గతంలో టీడీపీ ఓడిన వెంటనే వైసీపీలో చేరిన ఆయన ఇప్పుడు వైసీపీ ఓడిపోగానే ఆ పార్టీకి రాజీనామా చేశారు.
శిద్దా రాఘవరావు 2014లో దర్శి నుంచి తెలుగుదేశం పార్టీ అభ్యర్థిగా పోటీ చేసి ఎమ్మెల్యేగా గెలిచారు. తొలిసారిగా గెలిచినప్పటికీ శిద్దా రాఘవరావుకు మంత్రి పదవి ఇచ్చారు చంద్రబాబు. అటవీ శాఖతో పాటు పర్యావరణం, సైన్స్ అండ్ టెక్నాలజీ మంత్రిగా వ్యవహరించారు శిద్దా రాఘవరావు. ఇక 2019 ఎన్నికల్లో ఒంగోలు పార్లమెంట్ టీడీపీ అభ్యర్థిగా పోటీ చేసి ఓడిపోయారు. ఐతే ఎన్నికల్లో వైసీపీ గెలవడంతో 2020లో ఆ పార్టీ కండువా కప్పుకున్నారు.
ఇక ఇటీవలి ఎన్నికల్లో వైసీపీ నుంచి తన కొడుకు శిద్దా సుధీర్‌ కోసం దర్శి టికెట్ ఆశించారు రాఘవరావు. ఐతే వైసీపీ బూచేపల్లి శివప్రసాద్ రెడ్డికి దర్శి టికెట్ కేటాయించడంతో ఆయన విజయం సాధించారు. ఇక కొంతకాలంగా సైలెంట్‌గా ఉన్న శిద్దా రాఘవరావు తాజాగా వైసీపీకి రాజీనామా చేశారు. త్వరలోనే ఆయన టీడీపీ కండువా కప్పుకుంటారని తెలుస్తోంది. శిద్దా రాఘవ రావుకు గ్రానైట్ వ్యాపారాలున్నాయి. ఈ వ్యాపారాల కోసమే ఆయన టీడీపీలో చేరబోతున్నారని తెలుస్తోంది.
