జగన్ స్టిక్కర్ పీకేసిన కుక్కపై పోలీస్ కేసు..!

మా నమ్మకం నువ్వే జగన్ అంటూ ఇటీవల వైసీపీ నేతలు ప్రతి ఇంటికీ వెళ్లి స్టిక్కర్ అంటించి వస్తున్నారు. అయితే ఈ స్టిక్కర్లను కొంతమంది టీడీపీ, జనసేన నేతలు పీకేస్తున్నారని, వాటిపై వారి వారి నాయకుల స్టిక్కర్లు వేస్తున్నారనే ఆరోపణలున్నాయి. ఇటీవల ఓ కుక్క జగన్ స్టిక్కర్ పీకేస్తున్నట్టు ఉన్న వీడియో సోషల్ మీడియాలో వైరల్ గా మారింది. దీంతో ఈ వ్యవహారాన్ని హైలెట్ చేస్తూ, కాస్త కామెడీ జోడిస్తూ టీడీపీ నేతలు పోలీసులకు ఫిర్యాదు చేశారు. విజయవాడలో కుక్కపై ఫిర్యాదు చేశారు టీడీపీ మహిళా నేతలు.

తమకి జగన్ అంటే అభిమానమని, అలాంటి నాయకుడి స్టిక్కర్లు కుక్క పీకేస్తుంటే చూస్తూ ఊరుకోవడం సరికాదని, తమ నాయకుడి స్టిక్కర్లు కుక్క పీకేస్తే తమకు అవమానమని, జగన్ కి కూడా అది అవమానమేనంటూ పోలీసు స్టేషన్ కి వచ్చారు. చివరకు స్టేషన్లో ఫిర్యాదు కూడా చేశారు. ఫిర్యాదుతోపాటు కుక్క ఆ స్టిక్కర్ పీకేస్తున్న వీడియోని కూడా పోలీసులకు అందించారు. ఆ తర్వాత బయటకొచ్చి మీడియా ముందు మరింత కామెడీ చేశారు. కుక్కను అరెస్ట్ చేయాల్సిందేనంటూ డిమాండ్ చేశారు.

ఇటీవల వైసీపీ నేతలపై కామెంట్లు చేస్తున్న టీడీపీ కార్యకర్తల్ని అరెస్ట్ చేసి కేసులు పెడుతున్న సంగతి తెలిసిందే. ఈ క్రమంలో కుక్కపై కూడా కేసు పెట్టాలని, దాన్ని అరెస్ట్ చేయాలని మహిళా నాయకులు డిమాండ్ చేస్తున్నారు. గౌరవ సీఎంను ఎవరు అవమానించినా ఊరుకోకూడదన్నారు. అది మనిషైనా, జంతువైనా కేసు పెట్టాల్సిందేనన్నారు. ఇప్పటికే ఆ కుక్క వీడియో సోషల్ మీడియాలో వైరల్ గా మారింది. ఇప్పుడు టీడీపీ మహిళా నేతల ఫిర్యాదుతో ఈ వ్యవహారం మరింత హైలెట్ అవుతోంది. దీనిపై వైసీపీ నేతలు ఎలా స్పందిస్తారో చూడాలి.