పవన్ పల్లకి ట్వీట్.. అంబటి అదిరిపోయే రిప్లై

పవన్ కల్యాణ్ ఎందుకో ఈరోజు జోరుమీదున్నారు. కథాకళి పేరుతో నాగబాబుతో ఓ సెటైరికల్ వీడియో చేయించి ట్విట్టర్లో పోస్ట్ చేయించిన పవన్, వెంటనే జగన్ పై ఓ కార్టూన్ ని కూడా పోస్ట్ చేశారు. ఆ కార్టూన్ లో జగన్ పల్లకిని వైసీపీ నాయకులు మోస్తున్నట్టుగా ఉంది. జగన్ అనుచరులంతా కొత్తా దేవుడండీ అనే పాట పాడుతున్నట్టు.. కార్టూన్ వేశారు. "నియంతలతో యుద్ధం చేయాల్సిన సమయం ఆసన్నమైనది" అని పవన్ కల్యాణ్ అన్నట్టుగా కార్టూన్ పైన హెడ్డింగ్ పెట్టారు. కొడాలి నాని, అంబటి రాంబాబు, బుగ్గన రాజేంద్రనాథ్ లాంటి వారిని వెంటనే గుర్తుపట్టే విధంగా ఈ కార్టూన్ ఉంది.

"పేదలు, పెత్తందార్ల మధ్య యుద్ధం.." అంటూ ఇటీవల వైసీపీ కూడా పోస్టర్ వార్ మొదలు పెట్టడంతో పవన్ కూడా దానికి కౌంటర్ గా కార్టూన్లు వేయిస్తున్నారు. ఆమధ్య పాపం పసివాడు పోస్టర్ రిలీజ్ చేశారు, ఇప్పుడు నియంతలతో యుద్ధం అంటూ మరో కార్టూన్ వేయించారు. అయితే దీనికి వెంటనే మంత్రి అంబటి రాంబాబు రిప్లై ఇచ్చారు. "మా నాయకుడినే మోస్తాం, ప్యాకేజి కోసం పక్క నాయకుడిని కాదు." అంటూ అంబటి ట్విట్టర్లో రిప్లై ఇచ్చారు. పరోక్షంగా ప్యాకేజీ విషయాన్ని గుర్తు చేశారు. పవన్, ఎప్పుడూ చంద్రబాబు పల్లకినే మోస్తారంటూ ఇన్ డైరెక్ట్ గా చురకలంటించారు.

ఓవైపు మహానాడు, మరోవైపు ఎన్టీఆర్ శతజయంతి సందర్భంగా టీడీపీ, వైసీపీ మధ్య మాటల యుద్ధం ముదిరిపోతుంటే.. ఇప్పుడు పవన్ కూడా వారిని కవ్విస్తూ కార్టూన్లతో సోషల్ మీడియాలో హడావిడి చేశారు. వెంటనే వైసీపీ నుంచి కూడా కౌంటర్లు పడ్డాయి. అంబటి జస్ట్ కార్టూన్ కి రెండులైన్లు వ్యాఖ్యానం జతచేసి రియాక్ట్ అయ్యారు. మరి మిగతా నాయకుల రియాక్షన్లు ఏ స్థాయిలో ఉంటాయో చూడాలి.