శ్రీలీల జోరు..సెట్స్‌పై ఒకేసారి ఏడు సినిమాలు

రాఘవేంద్రరావు దర్శకత్వ పర్యవేక్షణలో తెరకెక్కిన పెళ్లి సందడి సినిమాతో టాలీవుడ్‌కు పరిచయమైన బ్యూటీ శ్రీలీల. అందం, చలాకీతనం హుషారైన డ్యాన్స్‌తో ఈమె యువతరం మనసు దోచేసుకుంది. పెళ్లి సందడి సినిమా అనుకున్నంత విజయం సాధించకపోయినా శ్రీలీల వరుసగా ఆఫర్లు పట్టేస్తోంది. ఇప్పుడు ఆమె చేతిలో ఏడు సినిమాలు ఉన్నాయంటే ఆశ్చర్యం కలగక మానదు.

ప్రస్తుతం ఆమె రవితేజ సరసన ధమాకా అనే సినిమాలో నటిస్తోంది. ఈ సినిమా అతి త్వరలో ప్రేక్షకుల ముందుకు రానుండగా.. వచ్చే ఏడాది మాత్రం ఆమె నటించిన ఆరు సినిమాలు విడుదల కానున్నాయి. ధమాకా సినిమాతో పాటు శ్రీలీల నవీన్ పోలిశెట్టి హీరోగా తెరకెక్కుతున్న అనగనగా ఒక రాజు సినిమాలో నటిస్తోంది. అలాగే నితిన్ హీరోగా వక్కంతం వంశీ దర్శకత్వంలో వస్తున్న సినిమాలో కూడా శ్రీలీలనే హీరోయిన్.

ఇవి కాకుండా యంగ్ హీరో రామ్ - బోయపాటి కాంబినేషన్లో తెరకెక్కుతున్న సినిమాలో, వైష్ణవ్ తేజ్ హీరోగా నటిస్తున్న మరో సినిమాలో శ్రీలీల హీరోయిన్‌గా నటిస్తోంది. ఇక సీనియర్ హీరో బాలకృష్ణ అనిల్ రావిపూడి దర్శకత్వంలో ఓ సినిమా చేస్తున్న సంగతి తెలిసిందే. ఈ సినిమాలో ఓ కీలక పాత్రలో శ్రీలీల నటిస్తోంది.

శ్రీలీల ప్రస్తుతం మరో బంపర్ ఆఫర్ పట్టేసింది. ఏకంగా మహేష్ బాబు సినిమాలో హీరోయిన్‌గా ఛాన్స్ కొట్టేసింది. మహేష్ బాబు హీరోగా త్రివిక్రమ్ దర్శకత్వంలో ఓ సినిమా తెరకెక్కుతున్న సంగతి తెలిసిందే. ఈ సినిమాలో పూజ హెగ్డే హీరోయిన్‌గా నటిస్తోంది. ఈ సినిమాలో మరో హీరోయిన్‌కు అవకాశం ఉన్నట్లు తెలుస్తోంది. ఆ పాత్ర కోసం త్రివిక్రమ్ శ్రీలీలను ఎంపిక చేసినట్లు సమాచారం. ఇప్పటికే ఆరు సినిమాల్లో నటిస్తున్న శ్రీలీల ఇప్పుడు మరో ఛాన్స్ పట్టేసి బిజీ బిజీగా మారింది.